भक्तपुर, २१ पुस सरकारी स्वामित्वको उदयपुर सिमेन्ट कारखानाको महाप्रबन्धकमा गोपी न्यौपाने नियुक्त भएका छन् । मन्त्रीपरिषद् बैठकले न्यौपानेलाई महाप्रबन्धकमा नियुक्त गर्ने निर्णय गरेको हो ।
भक्तपुरको गठ्ठाघर निवासी न्यौपाने व्यवस्थापनको क्षेत्रमा अनुभवी छन् । चौधरी ग्रुपको महाप्रबन्धक रहेको अनुभव उनीसंग छ भने उनले व्यवस्थापन र कानुनमा स्नातकोत्तर गरेका छन् । उनी आफै पनि व्यवसायी हुन् । त्यसका अलावा शिक्षा तथा स्वास्थ्य क्षेत्रमा समेत उनको संलग्नता रहेको छ । गठ्ठाघरस्थित नागरिक हेल्थ ट्रस्ट फन्डका अध्यक्ष रहेका न्यौपाने समाजसेवी समेत हुन् ।
उद्योग मन्त्रालयको सिफारिस समितिको सिफारिसका आधारमा न्यापाने लाई मन्त्रिपरिषदले उदयपुर सिमेन्ट कारखानाको महाप्रबन्धकमा नियुक्त गर्ने निर्णय गरेको हो । सिफारिसमा परेका ध्रुवबहादुर देवकोटा र भूपेन्द्रप्रसाद अर्याललाई पछि पार्दै न्याैपाने नियुक्त हुन सफल भएका हुन् ।