भक्तपुर, १५ माघ ‘गुणस्तरीय नर्सिङ सेवा हाम्रो सान, सेवा र श्रमको गरौं सम्मान’ भन्ने आह्वान सहित ५९ औं नर्सिङ दिवस मनाइएको छ । नर्सिङ दिवसको अवसर पारेर भक्तपुर अस्पतालमा आयोजित एक कार्यक्रमका बीच सेवा निवृत्त नर्सिङ स्टाफहरु सम्मानित समेत भएका छन् । बिहीबार भक्तपुर अस्पतालमा आयोजित सम्मान तथा बिदाइ कार्यक्रमका बीच ८ जना सेवा निवृत्त नर्सिङ स्टाफ सम्मानित भएका हुन् । सम्मानित हुनेहरुमा नर्सिङ अधिकृत भवानी थापा, निलकमल बस्नेत,स्टाफ नर्स कृष्णा बस्नेत, ज्ञानेश्वरी पाण्डे, उषा गौतम, सावित्रा गौतम , दिलमाया थापामगर र अनमी विमला श्रेष्ठ रहेका छन् । भक्तपुर अस्पताल र नर्सिङ एसोसिएसन अफ नेपाल, भक्तपुर अस्पताल शाखाको आयोजनामा आयोजित उक्त कार्यक्रममा उनीहरूलाई अस्पतालका अध्यक्ष मिलन सुवाल, मेसु डा सुमित्रा गौतम र स्वास्थ्य तथा सामाजिक विकास महाशाखाकी प्रमुख रोशनी लक्ष्मी तुइतुइ लगायतले दोसल्ला र सम्मान पत्रद्वारा सम्मानित गरेका अस्पतालकी निमित्त नर्सिङ प्रमुख रोशनी श्रेष्ठले जनाएकी छन् । कार्यक्रममा श्रेष्ठ समेत सम्मानित भएकी छन् । उनलाई मेडलसहित सम्मान गरिएको छ । अस्पतालले सेवा निवृत्त तथा २० वर्ष सेवा अवधि पूरा गरेका नर्सहरुलाई सम्मान गरेको मेसु डा सुमित्रा गौतमले जानकारी गराएकी छन् । उक्त अवसरमा अध्यक्ष सुवाल, मेसु डा गौतम र महाशाखा प्रमुख तुइतुइ लगायतले अस्पतालमा नर्सिङ सेवाको औचित्य र महत्व माथि प्रकाश पार्दै सेवा निवृत्त नर्सिङ स्टाफको सुखद निवृत्त जीवनको कामना गरेका थिए । त्यसैगरी सम्मानित भएका नर्सहरु अस्पतालले आफ्नो सेवालाई सम्झेर सम्मान र बिदाइ गरेकोमा दङ्ग देखिए । कार्यक्रममा अस्पतालका मेडिकल र नर्सिङ शाखाका स्टाफहरुको उपस्थिति रहेको थियो ।