भक्तपुर, ३ असोज भक्तपुरको चाँगुनारायण नगरपालिका दुवाकोटस्थित छोरीको डेरामा बस्दै आएका दोलखाका श्रमजीवी एक जेष्ठ नागरिकलाई साहित्यकार गणेश रसिकले २० हजार रुपैयाँ नगदसहित सम्मान प्रदान गरेका छन् । आफ्नो ७६ औं जन्मोत्सवका अवसरमा उनले जेष्ठ नागरिक दोलखा स्थायी घर भएका वीरबहादुर सुनुवारलाई नगद सहित सम्मान गरेका हुन् ।
कान्तिपुरको शनिबार संस्करणमा वीरबहादुरको जीवन यात्रा र उनको संघर्षबारे छापिएको समाचार पढेपछि साहित्यकार
रसिक उनलाई सम्मान गर्न आइतवार दुवाकोट आएका थिए ।
शनिवार प्रकाशित समाचारमा वयोवृद्ध उमेरमा पनि सिंहदरवारका महल रंगाएर श्रीमतीको उपचार गर्ने लक्ष लिएर देशकै प्रमुख प्रशासनिक स्थल सिंहदरवारमा पुगेका वीरबहादुरको दु:ख देखाइएको थियो । उनकी श्रीमती लामो समयदेखि अल्जाइमर्सबाट ग्रसित बनेकी बताइएको छ । आर्थिक अभावमा उनको राम्रो उपचार हुन सकेको छैन ।
गायक रसिकले हरेक वर्ष यसैगरी सहयोग र सम्मान गर्ने घोषणा समेत गरेका छन् । वास्तविक नाम गणेशकुमार राई रहेका गणेश रसिक नेपाली साहित्यका कथाकार, कवि र गायक हुन् । यीनको जन्म भोजपुर जिल्लामा भएको हो ।