भक्तपुर, २१ असोज पूर्वप्रधानमन्त्री समेत रहेका नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल’प्रचण्ड’ भक्तपुर आउने भएका छन् । शुक्रवार पार्टी कार्यक्रमको सिलसिलामा उनी भक्तपुर आउन लागेका हुन् ।
पार्टीका भक्तपुर जिल्ला समन्वय समितिका संयोजक डिपी ढकालले प्रचण्ड भक्तपुर आउने कार्यक्रम रहेको पुष्टि गरे । उनका अनुसार जिल्लाको बिस्तारित बैठक र कार्यकर्ता प्रशिक्षण कार्यक्रममा प्रमुख अतिथिको रुपमा अध्यक्ष प्रचण्डलाई आमन्त्रण गरिएको हो । शुक्रवार दिउँसो साढे ३ बजे उनले भक्तपुरका कार्यकर्तालाई प्रशिक्षणात्मक सम्बोधन गर्ने कार्यक्रम तय भएको उनको भनाइ छ ।
उक्त अवसरमा भक्तपुरमा रहेका केन्द्र, प्रदेश, जिल्ला र नगर कमिटीका सबैजना सहभागी हुन पाउने व्यवस्था मिलाइएको बताइएको छ । वडा कमिटीका भने पदाधिकारी मात्र उपस्थित रहने बताइएको छ । त्यसैगरी जनवर्गीय संगठनका तर्फबाट पनि पदाधिकारीलाई मात्र अध्यक्ष प्रचण्डको प्रशिक्षण प्राप्त गर्न अवसर दिइएको छ ।
सहायक संगठनको रुपमा रहेको वाइसिएललाई अध्यक्ष प्रचण्डको सुरक्षाको जिम्मा दिइएको बुझिएको छ । वाइसिएलका सबै कार्यकर्तालाई उपस्थित हुन सूचना गरिएको वाइसिएल नेता नरेश वाइवाले जनाएका छन् । कार्यक्रम स्थल भने सूर्यविनायकस्थित बाराही अजिमा पार्टी प्यालेसलाई तोकिएको छ ।