भक्तपुर, ३० पुस २०७८कोरोना भाइरसको त्रास बढेसंगै कोरोना विरुद्धको खोप लगाउन सयौं मानिसहरु कटुञ्जे स्वास्थ्य चौकीमा भेला भएपछि स्वास्थ्यकर्मी नै छक्क परेका छन् । पटक पटक खोप अभियान चलिसक्दा पनि खोप नलगाएका सयौं मानिसहरु एक्कासी आइपुगेपछि उनीहरु छक्क परेका हुन् ।
शुक्रवार कोरोना विरुद्धको खोप लगाउन सयौं मानिसहरु बिहानै देखि लाइन लागेपछि जनस्वास्थ्य कार्यालय संग समन्वय गरी खोप प्रदान गरिएको स्वास्थ्य चौकीका बरिष्ठ स्वास्थ्यकर्मी कृष्णप्रसाद अधिकारीले जनाएका छन् । आफूहरुले खोप संचालन गरिने कहिकतै सार्वजनिक सूचना वा जानकारी नगराएको बताउदै अधिकारीले शुक्रवार स्वत मानिसहरु स्वास्थ्यचौकीमा खोपको लागि लाइन लागेपछि अचम्मीत भएको प्रतिक्रिया दिए । उनले शुक्रवार बिना तयारी ३ सय बढी मानिसहरुलाई कोभिड विरुद्धको चिनिया खोप भेरोसेल लगाउनु परेको बताए ।
सरकारले स्वास्थ्यकर्मीलाई बुस्टर डोज दिने भनिएपनि त्यो नभइराखेको अवस्थामा अझै ठुलो संख्यामा सर्वसाधारण मानिसहरु खोपबाट बन्चित भएका शुक्रवारको भीडले देखाएको स्थानीय समाजसेवी एवं बरिष्ठ पत्रकार रमेश खड्काले बताए । मानिसहरु अझै पनि खोपबाट बन्चित रहेका देखिएकोले सेवा प्रवाहमा खोप कार्ड अनिवार्य भन्ने कुरा सम्भव नहुने उनको तर्क छ ।
स्वास्थ्य चौकीका अध्यक्ष एवं वडाध्यक्ष राजकुमार जोशीले भने मानिसहरुले खोप नपाएको नभई खोप कार्ड हराएको हुनाले कार्ड अनिवार्य हुने कुरा सुनेर कार्डका लागि खोप लगाउन आएका हुनसक्ने आशंका गरेका छन् । बाहिरबाट यहाँ डेरामा बस्न आएकाहरु खोप लगाउन आउँदा भीड बढेको उनले दावी गरे । स्वास्थ्य चौकीले भने शुक्रवार ठुलो संख्या उपस्थित भएकोले खोप लगाउन बाध्य भएको भन्दै स्वास्थ्य चौकीमा खोप नभएकोले अब लगाउन नसकिने जानकारी गराएको छ ।
मानिसहरु बास्तवमै खोपबाट बन्चित भएका हुन् भने सोको चित्तबुझ्दो कारणसहित आएमा खोप उपलब्ध गराउनुपर्ने सत्तारुढ दल नेपाली काँग्रेसका सूर्यविनायक नगर सभापति निशान ढुंगेलले बताए । नगरपालिकामा कति मानिस खोपबाट बन्चित छन् र किन बन्चित भए भन्ने जवाफ नगरपालिकाले दिनुपर्ने उनको भनाइ रहेको छ ।