भक्तपुर, १२ चैत २०७८भक्तपुरको छ लेन सडक अन्तर्गत सृजनानगरमा गएराति दुर्घटना हुँदा एक युवकको ज्यान गएको छ । ज्यान गुमाउने युवक चाँगुनारायण-८ सुडालका ३६ वर्षिय रमेश तिमिल्सिना भएको प्रहरीको भनाइ छ ।
गएराति आफ्नै मोटरसाइकल बाट घर फर्कदै गरेका तिमिल्सिनालाई ८:०५ बजेको समयमा भनपा-१ सृजनानगरस्थित बस पकेटमा सोही दिशातर्फ आइरहेको बा. ४ ख. २००१ को हेलम्बु यातायातको बसले ठक्कर दिएको थियो । गम्भीर घाइते उनलाई उपचारको लागि सल्लाघारीस्थित डा इवामुरा अस्पताल पुर्याइएको तर, सम्बन्धित चिकित्सकले ८ :२५ बजेको समयमा नै उनलाई मृत घोषित गरिदिएका डिएसपी राजु पाण्डेले जानकारी दिए ।
दुर्घटना पछि बस र त्यसका चालक फरार रहेकामा राति नै प्रहरी नियन्त्रणमा आएका बताइएको छ । बस चालक सिन्धुपाल्चोक पाँचपोखरी-७ का २८ वर्षिय सागरबिक्रम थापालाई नियन्त्रणमा लिइ दुर्घटनाबारे जगाती बृत्तले थप अनुसन्धान गरिरहेको छ ।
मृतक तिमिल्सिना चाँगुनारायणका स्थानीय नेता समेत हुन् । उनी नेकपा (एमाले)का स्थानीय नेता भएका एमाले चागुनारायणका उपाध्यक्ष जयराम बास्तोलाले बताए । मृतक तिमिल्सिनाको शोकमा एमाले चाँगुनारायणले पूर्वनिर्धारित शनिवारका सबै कार्यक्रम स्थगित गरेको छ । उपाध्यक्ष बास्तोलाले तिमिल्सिनाको निधनले पार्टीलाई अपूर्णनीय क्षती भएको भन्दै घटनाको सत्यतथ्य छानवीन गरी दोषी उपर कडा कार्वाही हुनुपर्ने बताएका छन् ।