भक्तपुर, १३ चैत २०७८स्थानीय तहको चुनाव नजिकिदै गर्दा जिल्ला प्रशासन कार्यालय भक्तपुर पनि चुनाव केन्द्रीत बनेको छ । जिल्लामा शान्ति सुरक्षाको जिम्मा पाएको जिल्ला प्रशासन कार्यालयले लाइसेन्स लिएर राखिएका हातहतियार बुझाउन आइतवार आदेश नै जारी गरेको हो ।
निर्वाचनलाई भयरहित बनाउन यस्तो आदेश जारी गरिएको भक्तपुर सिडिओ रुद्रादेवी शर्माले जानकारी गराइन । गृहमन्त्री बालकृष्ण खाँडको अध्यक्षतामा बसेको केन्द्रीय सुरक्षा समितिको बैठकले गरेको निर्णय अनुसार इजाजत प्राप्त हतियार बुझाउन आइतवार सूचना जारी गरिएको उनको भनाइ छ ।
लाइसेन्स प्राप्त हतियार बुझाउन चैत मसान्त सम्मको समयसीमा तोकिएको छ । इजाजत प्राप्त हतियार धनीले नजिकैको प्रहरी इकाइमा हतियार बुझाउन सक्ने व्यवस्था मिलाइएको जिप्रकाकी प्रशासकीय अधिकृत उर्मिला खतिवडा घिमिरेले बताइन । बुझाइएका ती हतियारहरु चुनाव पछि फिर्ता गरिने बताइएको छ ।
सरकारले आगामी वैशाख ३० गते स्थानीय तहको चुनाव गर्ने निर्णय गरेको छ । व्यक्ति संग भएका हतियार चुनावमा दुरुपयोग नहोस भन्ने उदेश्यले इजाजत प्राप्त हतियार बुझाउन सूचना जारी भएको हो ।
हातहतियार तथा खरखजनासम्बन्धी ऐनमा सुरक्षा थ्रेट भएका व्यक्ति तथा आर्थिक कारोबार गर्ने संस्थाले इजाजत लिएर हतियार राख्न पाउने प्रावधान रहेको छ ।