भक्तपुर, ५ बैशाख २०७९गठबन्धनलाई भक्तपुर काँग्रेसले कम आक्न नमिल्ने नेपाली काँग्रेस जिल्ला कार्यसमिति भक्तपुरका सचिव सुशील बस्नेतले बताएका छन् । पाँच दलीय गठबन्धनकै कारण भक्तपुर काँग्रेसले २ मन्त्री पाएको गुन भुल्न नहुने उनले बताएका हुन् ।
गठबन्धनको केन्द्रीय निर्देशनलाई भक्तपुर काँग्रेसले सकारात्मक रुपमा लिएको जिकिर गर्दै सचिव बस्नेतले भक्तपुरको स्थानीय निर्वाचनमा पाँच दलले संयुक्त मोर्चा बनाएर सहभागी हुने बिश्वास ब्यत गरे । आफ्नो पार्टीका जिल्ला सभापति दुर्लभ थापाको संयोजकत्वमा पाँच दलीय संयन्त्रको कार्यदल समेत गठन गरिएको र त्यसले स्थानीय तहका पदहरु सम्मानजनकरुपमा बाडफाड गर्ने उनको भनाइ छ ।
”पाँच दलीय गठबन्धन नबनेको भए बागमती प्रदेशमा भक्तपुर कांग्रेसका नेताद्वय माननीय कृष्णलाल भडेल र माननीय रजनी जोन्छे मन्त्री हुनुहुने थिएन । यो कुरा कोहिपनि काँग्रेसका नेताकार्यकर्ताले भुल्न हुँदैन ।” सचिव बस्नेतले भने । सांसद कृष्णलाल भँडेल प्रदेशको प्रभावशाली मानिएको भौतिक पुर्वाधार मन्त्री रहेका छन् भने जोन्छे बागमती प्रदेश सरकारको उद्योग,बाणिज्य तथा आपूर्ति राज्यमन्त्री रहेकी छन् । उनीहरुले पार्टी र जिलालाकै शान उचो राख्दै प्रदेशको बिकासमा योगदान गरिरहेका सचिव बस्नेतले बताए ।
गत स्थानीय तहको निर्वाचनमा काँग्रेसले मध्यपुरमा उपमेयर र जिल्लाभर १३ वटा स्थानीय वडा जितेको जानकारी दिंदै उनले त्यसमा आफ्नो पार्टीको दावी रहेको खुलासा समेत गरेका छन् । त्यसैगरी, गत स्थानीय निर्वाचनमा प्रमुख प्रतिष्पर्धीको रुपमा रहेका ठाउँमा समेत काँग्रेसले दावी नछाड्ने उनले संकेत गरे । पाँच वडामा काँग्रेस निकटतम प्रतिद्वन्दी रहेको थियो ।जिल्लामा ४ नगरपालिका र ३८ वडा रहेका छन् ।
गत निर्वाचनमा नेकपा (माओवादी केन्द्र) जिल्लामा तेस्रो प्रतिष्पर्धीको रुपमा रहेपनि पदविहीन हुनुपरेको थियो भने नेकपा(एकीकृत समाजवादी) एमालेसंग विभाजित भएकोले उसको मत यकिन भैसकेको अवस्था छैन । गठबन्धनमा एकीकृत समाजवादीले आफूलाई एमाले सरह शक्तिको रुपमा अघि सार्दै आएको छ । गठबन्धनमा नेपाली कांग्रेस, नेकपा(माओवादी केन्द्र), नेकपा(एकीकृत समाजवादी), जनता समाजवादी पार्टी नेपाल र राष्ट्रिय जनमोर्चा रहेका छन् ।
नेपाली काँग्रेस भक्तपुरका सचिव सुशील बस्नेतले भने गत निर्वाचनको आकारमा केन्द्रीत रहेर भन्दा सबैलाई चित्त बुझ्ने गरी सम्मानजनक ढंगले निर्वाचनमा सहभागी हुने वातावरण बनाइने जानकारी दिए । ”हिजो संगै लडेर प्रतिगमनलाई परास्त गरियो, आज संगै मिलेर संविधान र लोकतन्त्रलाई बलियो बनाउनुछ ।” उनले भने । आफ्नो पार्टीले सभापति थापालाई गठबन्धनसम्बन्धी सम्पूर्ण निर्णयको अधिकार प्रत्यायोजन गरेको प्रष्ट पार्दै सचिव बस्नेतले सभापति थापाले निर्णयको लागि पार्टीमा कसैको मुख ताक्नु पर्ने अवस्था नरहेको दावी गरे ।