![naresh](https://bhaktapurpost.com/wp-content/themes/onlineparda/images/1px.gif)
चाँगुनारायण नगरपालिकामा प्रत्येक दल छुट्टाछुट्टै मैदानमा उत्रिएका छन् । भक्तपुरको ३ नगरपालिकामा गठबन्धन बनाएको सत्तारुढ गठबन्धनका दलहरुले समेत चाँगुनारायणमा छुट्टा छुट्टै उम्मेद्वारी दिएपछि चाँगुनारायणको चुनाव चाखलाग्दो बनेको छ ।
चाँगुनारायणमा सत्तारुढ गठबन्धनको प्रमुख घटक नेपाली काँग्रेसका क्षेत्रीय सभापति जीवन खत्रीले मेयरमा उम्मेद्वारी दिएका छन् भने उपमेयरमा सुभद्रा काफ्लेले उम्मेद्वारी दिएकी छन् । अर्को घटक नेकपा (माओवादी केन्द्र)का नगर अध्यक्ष नरेश खड्काले पनि मेयरमा उम्मेद्वारी दिएका छन् भने उनको दलबाट चण्डिका पाण्डे उपमेयरको उम्मेदवार बनेकी छन् । त्यसैगरी अर्को घटक नेकपा(एकीकृत समाजवादी)का नगर अध्यक्ष इश्वर खड्काको पनि मेयरमा उम्मेद्वारी परेको छ । उक्त पार्टीबाट उपमेयरमा दुर्गा खड्काले उम्मेद्वारी दिएकी छन् । यी ३ दलले प्रदेश स्तरीय निर्णय गरेर भक्तपुरका ३ नगरमा पदहरु बाडफाड गरेका थिए भने चाँगुनारायणमा भने सहमती गर्न सकेका थिएनन । जिल्ला र स्थानीय पार्टीले पनि सहमती गर्न नसकेपछि ३ दल छुट्टा छुट्टै चुनावी मैदानमा उत्रिएका हुन् ।
राप्रपालाई गत उपनिर्वाचनका बेला चाँगुनारायणमा मेयर दिने काँग्रेसले लिखित सहमती नै गरेकोले काँग्रेस सत्तारुढ गठबन्धनमा नजोदिएको बताइएको छ । काँग्रेसले उपप्रमुख प्रस्ताव गरेपनि राप्रपाले मानेन । राप्रपाका सहमहामन्त्री रहेका चाँगुनारायणका नेता रवीन्द्रप्रताप शाहको नेतृत्वमा राप्रपाले उम्मेद्वारी दर्ता गराएपछि गठबन्धन झन् पेचिलो बनेको छ । गठबन्धनका नेताहरुले भने अझै सहमती र सहकार्यको प्रयास जारी राखेका बुझिएको छ ।