नेकपा (एमाले)का सांसद महेश बस्नेतले सत्ता गठबन्धनका शीर्ष नेता र सरकारका मन्त्रीलाई कारबाही गर्नुपर्ने माग गरेका छन्।

प्रतिनिधिसभाको शून्य समयमा बोल्दै सांसद बस्नेतले केही व्यक्तिहरु एमालेको अर्थ योजना विभागको सदस्य एम अधिकारी खोजिरहेको भन्दै यस्तो बताएका हुन्।

उनले भने, ‘देशी विदेशी शक्ति गुहारेर राष्ट्रपति र प्रधानमन्त्री पालैपालो बनेर राज्यको दोहन गर्ने र परिवारवाद लाद्ने नेता एस देउवा (शेरबहादुर देउवा), माओवादी नेता पी दाहाल(पुष्पकमल दाहाल), नेतृ ए राणा देउवा (आरजु राणा) खोजेर कारबाही गर्नुपर्ने होइन र?

उनले निवर्तमान अर्थमन्त्री जनार्दन शर्मालाई पनि कारबाहीको माग गरे। ‘बजेटमा रातारात सेटिङ गरेर कर र भन्सारका दररेटमा गडबड गरेर सिसिटिभी फुटेज लगायतका प्रमाण नष्ट गर्ने र कमिशन ६ अर्बभन्दा बढी गडबडी गर्ने माओवादी नेताजी शर्मालाई खोजेर कारबाही गर्नुपर्ने होइन ? उनले भने, पेट्रोलियमको भाउ, महँगी र कालोबजारीलाई प्रोत्साहन गर्ने आपूर्ति मन्त्री कांग्रेस नेता डी बडू (दिलेन्द्र बडू) लाई कारबाही गर्नुपर्ने होइन र ?

उनले मल अभाव र पुस्तक अभाव गराई किसान र विधार्थीको भविष्यमा खेलबाड गर्ने एम यादव (महिन्द्रराय यादव) र डी पौडेल (देवेन्द्र पौडेल)लाई कारबाही गर्नुपर्ने उनको माग छ ।