भक्तपुर, १३ असार २०८० अर्थमन्त्री डा. प्रकाशशरण महतले गत जेठ १५ गते पेस गरेको आगामी आर्थिक वर्षको बजेट प्रतिनिधि सभाको बुधबारको बैठकले पारित गरेको छ। प्रतिनिधिसभाको बुधवार बसेको बैठकमा अर्थमन्त्री डा. प्रकाशशरण महतले प्रस्तुत बजेट बहुमतका आधारमा पारित भएको हो ।
बजेट पारित गर्नका लागि मत विभाजनको प्रक्रिया अपनाइएको थियो। कुल उपस्थित सांसद २५५ मध्ये प्रस्तावको पक्षमा १ सय ४७ र विपक्षमा १ सय ८ मत परेको थियो । मत दिन्न भन्ने सांसदको सङ्ख्या शून्य रहेको छ।
नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टीसहित सत्ता गठबन्धनका दलले बजेट पारित गर्न संसदीय दलमा अनिवार्य उपस्थिति हुन र प्रस्तावको पक्षमा मतदान गर्न ह्वीप लगाएका थिए। प्रमुख प्रतिपक्षी दल नेकपा (एमाले) र राष्ट्रिय स्वतन्त्र पार्टीसहितका विपक्षी दलले विपक्षमा मतदान गरे।
बजेट पारित भएसँगै आगामी साउन १ गतेबाट नयाँ आर्थिक वर्षको बजेट कार्यान्वयनमा आउनेछ। अर्थमन्त्री महतले आर्थिक वर्ष २०८०/८१ का लागि १७ खर्ब ५१ अर्ब रुपियाँको बजेट प्रस्तुत गरेका छन् ।