भक्तपुर, १४ साउन २०८० ललितपुरस्थित सदर चिडियाखानालाई भक्तपुर नसार्न माग गरिएको छ । ललितपुर महानगरपालिकाको मेयर चिरीबाबु महर्जनले उक्त माग गरेका हुन् ।
बाघ संरक्षण दिवसको अवसरमा जावलाखेलस्थित सदर चिडियाखानामा आयोजित कार्यक्रमलाई सम्बोधन गर्दै मेयर महर्जनले भक्तपुरको सूर्यविनायकमा सार्ने भनिएको सदर चिडियाखानालाई नसार्न वन तथा वातावरण मन्त्री डा वीरेन्द्रप्रसाद महतो समक्ष आग्रह गरेका छन् । मेयर महर्जनले महानगर आवश्यक सहयोगका लागि तयार रहेको भन्दै आफ्नो ठाउँबाट चिडियाखाना नसार्न आग्रह गरेका हुन् ।
शहरको बीचमा रहेको चिडियाखाना साँघुरो भएको र जनावरहरुलाई उचित वातावरण नभएको भन्दै सरकारले भक्तपुरको सूर्यविनायकस्थित जंगलमा कार्यालय खडा गरी संरचना नैं बनाएर चिडियाखाना सार्ने तयारी गरिरहेको अवस्थामा महानगरका मेयर महर्जनले चिडियाखाना नसार्न सार्वजनिकरुपमै आग्रह गरे ।
महानगरले चिडियाखानालाई सहयोग गर्दै आएको छ । कोरोना महामारीको कारण आम्दानी नहुँदा जनावरहरुलाई आहारा खुवाउन समस्या भएपछि महानगरले बजेटको व्यवस्था गरिदिएको थियो । अहिले पनि महानगरले बाघको आहारको जिम्मा लिएको बताइएको छ । कार्यक्रममा प्रमुख महर्जनलाई वन्यजन्तु संरक्षणमा सहयोग गरेवापत सम्मान समेत गरिएको थियो ।