सरकारले सबै अस्पताललाई आफ्नै फार्मेसी सञ्चालन गर्न निर्देशन दिएको छ । स्वास्थ्य तथा जनसङ्ख्या मन्त्रालयले अस्पताल परिसरभित्र आफ्नै स्वामित्वमा फार्मेसी संचालन गर्न निर्देशन दिएको हो ।

सरकारी र सामुदायिकाका लागि मात्र  नभई निजी र गैरसरकारी अस्पतालले समेत आफ्नै स्वामित्वमा फार्मेसी सञ्चालन गर्न परिपत्र गरिएको मन्त्रालय श्रोतले पुष्टि गरेको छ । यसका लागि एक महिनाको समयसीमा दिइएको बताइएको छ ।

आफ्नै स्वामित्वमा अस्पताल फार्मेसी सञ्चालन नभएको पाइएमा कानूनबमोजिम आवश्यक कारबाही अघि बढाइनेछ,’ परिपत्रमा भनिएको छ । परिपत्रमा अस्पताल फार्मेसीले २४ घण्टा नै सेवा दिनुपर्ने उल्लेख छ ।

अस्पतालको न्यूनतम सेवा मापदण्डमा समेत अस्पताल हाताभित्र अस्पतालको आफ्नै फार्मेसी हुनुपर्ने र सोबाहेक अन्य फार्मेसी हुनुनहुने भन्ने उल्लेख गरिएको छ । त्यसैको आधारमा सरकारले कडाइ गरेको हो ।

भक्तपुरका अधिकांश अस्पतालको आफ्नै फार्मेसी छैनन् । उनीहरुले अरु कम्पनीलाई फार्मेसी संचालनको जिम्मा दिएका छन् । फार्मेसीले चर्को मूल्य असुलेको विषयमा अनुगमन हुँदा अस्पतालहरु फार्मेसी आफ्नो स्वामित्वमा नरहेको भन्दै पन्छिने गरेका छन् । सरकारको पछिल्लो परिपत्रले अस्पताललाई आफ्नै फार्मेसी संचालनमा कडाइ गरेको देखिन्छ ।