बेलायती राजकुमार एडवार्डकी श्रीमती सोफिया भक्तपुर आइपुगेकी छन् । बुधबार बिहान उनी भक्तपुर आइपुगेकी हुन् ।

राजकुमार एडवार्ड र श्रीमती सोफिया छुट्टाछुट्टै कार्यक्रमका लागि नेपालमा छन् । श्रीमती सोफियाले भक्तपुर अस्पताल अवलोकनको इच्छा गरेकाले उनी बुधबार बिहान भक्तपुर आइपुगेकी भक्तपुर अस्पतालका निमित्त निर्देशक डा सुरेन्द्र भट्टले बताएका छन् । श्रीमती सोफियालाई अस्पतालको प्रशुती बिभाग अवलोकन गराइएको उनले बताए ।

भक्तपुर अस्पतालको नयाँ भवन बेलायती सरकारको सहयोगमा निर्माण भएकोले अस्पताल बेलायती राजपरिवारको चासोमा परेको निमित्त निर्देशक भट्टको भनाइ छ । नेपालस्थित बेलायती राजदुतावासले भ्रमणको ब्यवस्था मिलाएको उनले बताए ।

श्रीमती सोफिया महिला तथा बालबालिकाको क्षेत्रमा काम गर्न रुचाउँछिन् । भक्तपुर अस्पतालमै उनको बागमती प्रदेशका स्वास्थ्य मन्त्री किरण थापा र सचिव डा सुमित्रा गौतमसंग भेटवार्ता भएको छ । मन्त्री थापा र सचिव डा गौतमले भक्तपुर अस्पताल लगायत प्रदेशका अस्पतालले पुर्याइरहेको स्वास्थ्य सेवाबारे श्रीमती सोफियालाई जानकारी गराएका छन् ।

भक्तपुर अस्पतालको अवलोकन पछि श्रीमती सोफिया भक्तपुर दरवार क्षेत्रको अवलोकन गर्ने कार्यक्रम रहेको छ । राजकुमार एडवार्डको  ब्यक्तिगत पारिवारिक भ्रमण भएकोले नगरपालिकाको तर्फबाट भने औपचारिक कार्यक्रम नराखिएको पर्यटन बिभाग प्रमुख गौतम लासिवाले जानकारी गराएका छन् ।

संस्कृतिविद रविन्द्र पुरीले राजकुमार एडवार्ड, श्रीमती सोफिया र उनको टोलीलाई लन्चको ब्यवस्था मिलाएका छन् । संयुक्त अधिराज्य बेलायतको राजपरिवारकको प्रभावशाली सदस्य राजकुमार एड्वार्ड र श्रीमती सोफियाको भ्रमणबाट भक्तपुरले लाभ लिन सक्ने बिश्वास गरिएको छ ।