भक्तपुर, १९ साउन २०८०‘राष्ट्रका लागि दुई घण्टा अभियान’ अन्तर्गत अभियन्ताहरुले चाँगुनारायण-२ को दुवाकोटमा सरसफाइ एवं सचेतना कार्यक्रम सम्पन्न गरेका छन् । शुक्रवार बिहान दुई घण्टा अभियन्ताहरु सरसफाइ र सचेतना कार्यक्रममा सरिक भएका हुन् ।
चाँगुनारायण-२ दुवाकोट मोडबाट शुरु भएको कार्यक्रम नमूना बस्तीमा पुगी बिसर्जन गरिएको थियो । चाँगुनारायण नगरपालिकाको वातावरण संरक्षण बिभाग संयोजक समेत रहेका वडाध्यक्ष सोमप्रसाद प्रधानको प्रमुख अतिथ्यतामा भएको कार्यक्रमको संचालन अभियानका महासचिव नवराज काफ्लेले गरेका थिए ।
उक्त अवसरमा नेपाल प्रहरी, सशस्त्र प्रहरी, नेपाल रेड्क्रस सोसाइटी, नेप्सेम्याक, प्रज्ञा आदर्श समाज, साहसी महिला समूह, मित्रश्री पाठशाला र सुनगाभा सेकेण्डरी स्कूलको संस्थागत सहभागिता रहेको थियो ।
अभियानमा सहभागीहरुले सडकको फोहोर मात्र टिपेनन, फोहोर जथाभावी नफाल्न समेत प्रेरित गरे । उनीहरूले सफा बाताबरणका लागि अपनाउनु पर्ने बिधिबारे बताउदै डेङ्गी जस्ता रोगबाट बच्न सुझाव दिएका थिए । अभियानकर्मीसंग स्थानीय स्वत: स्फूर्त जोडिएका देखिन्थे भने सहभागी विद्यार्थीले स्थानीयलाई फोहोर नगर्न र फोहोर ब्यवस्थापन गर्न सिकाएको दृश्य लोभलाग्दो देखिन्थ्यो ।
मित्रश्री पाठशालाका प्रधानाध्यापक दिपक बिष्टले कार्यक्रमले विद्यार्थीलाई समाजप्रती जवाफदेही बनाउने बिश्वास ब्यक्त गर्दै यस्ता अभियानमा विद्यार्थीहरुको सहभागीता बढाउदै लाने बताए । विद्यालयले अतिरिक्त क्रियाकलाप र शिक्षण सिकाइ अन्तर्गत नै सामेल गरेर सामाजिक गतिविधिमा विद्यार्थीलाई सामेल गराउने नीति रहेको उनको भनाइ छ ।
कार्यक्रमलाई सम्बोधन गर्दै प्रमुख अतिथी रहेका वडाध्यक्ष सोमप्रसाद प्रधानले सरसफाइले नै सभ्यताबारे बताउने भएकाले घर, टोल र नगर सफा राख्न अपिल गरे । इज्जत बढाउने र रोगबाट पनि बचाउने अभियानमा सबैको सहयोग मिल्ने बिश्वास ब्यक्त गर्दै उनले सीसीटिभीबाट वडाले निगरानी गरिरहेको जानकारी दिदै जथाभावी फोहोर फ्याक्नेलाई कार्वाही गरिने चेतावनी दिएका थिए ।
कार्यक्रममा अभियन्ताहरु हिक्मतसिंह, गोविन्द आचार्य, दिनेश थापा, पवन कार्की, मन्दिरा कार्की, संगीता बुढाथोकी, सुशीला महर्जन, सुस्मिता नेपाल लगायतको समेत सहभागिता रहेको थियो ।