भक्तपुर, २१ साउन २०८०तेलकोटबाट कमलबिनायक हुँदै काठमाडौ जाने सार्वजनिक यातायात नियमित नभएको भन्दै खरिपाटीका स्थानीय युवा विद्यार्थीहरुले यातायात ब्यवसायीको ध्यानाकर्षण गराएका छन् । यस् सम्बन्धमा उनीहरूले ख्वप भक्तपुर मिनिबस यातायात प्रालिलाई ध्यानाकर्षण गराएका हुन् ।
आइतबार दुधपाटीस्थित कार्यालयमा पुगी विद्यार्थीहरुले यातायात नियमित नहुदा पठनपाठन प्रभावित भएको बताए । कलेज जाने समयमा सार्वजनिक बस नहुदा कक्षा छुट्ने गरेको र फर्कदा पनि उस्तै हाल भएपछि भोकभोकै बस कुर्नुको बिकल्प नभएको उनीहरूको भनाइ छ । उनीहरूले उक्त क्षेत्रका बासिन्दालाई यातायातको सुगमता अनुभूत गराउन समेत ख्वप भक्तपुर मिनिबस यातायात प्रालिसंग आग्रह गरे ।
प्रालिले यातायात संचालन सम्बन्धी तालिका समेत उपलब्ध गराउन नसकेको प्रति आक्रोश ब्यक्त गर्दै उनीहरूले यातायात सेवालाई नियमित र भरपर्दो बनाउनु पर्नेमा जोड दिए । अन्यथा आफूहरु आन्दोलन गर्न बाध्य हुने विद्यार्थीहरुले चेतावनी समेत दिएका छन् ।
स्थानीय युवा तथा विद्यार्थीको आक्रोशलाई सम्बोधन गर्दै ख्वप भक्तपुर मिनिबस यातायात प्रालिका अध्यक्ष ज्ञानेन्द्र महर्जनले विद्यार्थीलाई बिहान कलेज जाने समयमा १५/२० मिनेटको फरकमा ३ वटा बसले सेवा पुर्याउने प्रतिवद्धता प्रकट गरे । उक्त क्षेत्रमा हाल ११ वटा बस संचालनमा रहेका जानकारी गराउदै उनले भदौ १ गतेबाट थप आधा दर्जन बस थप्ने आश्वासन समेत दिएका छन् ।
आइतबार स्थानीय युवा तथा विद्यार्थी र ख्वप भक्तपुर मिनिबस यातायात प्रालिबीचको बार्ता सकारात्मक रहेको स्थानीय युवा संजीवराज गिरीले जानकारी गराए । सो क्षेत्रको सार्वजनिक यातायात सेवालाई नियमित र व्यवस्थित बनाउन दुबै पक्ष सम्मीलित एक ९ सदस्यीय व्यवस्थापन तथा अनुगमन समिति बनाइएको उनले बताए ।