मध्यपुर थिमिको जिब्रो छेड्ने जात्रालाई विश्वसामु चिनाउनुपर्नेमा संस्कृती, पर्यटन तथा नागरिक उड्डयन मन्त्री सुदन किरातीले जोड दिएका छन् । जिब्रो छेड्ने जात्रा विश्वकै दुर्लभ जात्रा भएको र यो भक्तपुरको मध्यपुर थिमिमा मात्र मनाइने कुरा विश्वसामु पुर्याउनुपर्ने उनले बताएका हुन् ।

शुक्रवार येंयाँ पुन्ही अर्थात् आश्विन शुक्ल पूर्णिमाको साँझ मध्यपुर थिमि-५ दिगुलीमा जिब्रो छेड्ने जात्रा हेर्न आइपुगेका मन्त्री किरातीले यो अदम्य साहस युक्त संस्कार दुनियालाई देखाउनुपर्ने आवश्यकता औल्याए । शुक्रवार साँझ दिगुलीस्थित डवलीमा जिब्रो छेडाउने मध्यपुर थिमि–५ चोडे टोलका बालकराम नानीचा श्रेष्ठ र त्यसमा साथ् दिईरहेका जात्रालु प्रति उनले आभार समेत प्रकट गरेका छन् ।

नकर्मीले एक महिना अघि निर्माण गरी शुद्ध तोरीको तेलमा डुवाएर राखेको करिव १० इन्च लामो सुईरोबाट कमीनायोले बालकरामको जिब्रो छेडी दिएका थिए । त्यसपछि भ्यं (बासले बनेको महादीप) बोकेर बालकरामले नगर परिक्रमा गरे । साथै, जिब्रो छेडाई सकेपछि बालकरामले बाँसले निर्माण गरिएको भ्यं (महादिप) काँधमा बोकेर दिगुलीस्थित भैरवनाथलाई परिक्रमा गरी आफ्नो टोल चोडेस्थित गणेशको दर्शन गरे । त्यहाँबाट भुलाँखेल, सिद्धिकाली मन्दिर, सानोथिमि, पेप्सीकोला, एअरपोर्टको उत्तरपुर्वको बाटो हुँदैं पशुपतिनाथको दर्शनका लागि गएका थिए ।

जिब्रो छेडाई सकेपछि ४० किलो गह्रौ भ्यं (महादीप, अर्धचन्द्राकार बासले बनाइएको बस्तु)बोकेर बालकराम पशुपति पुग्दा उनलाई मध्यपुर थिमिको ठुलो जनसमुदायले पछ्याइरहेको थियो । मेयर सुरेन्द्र श्रेष्ठ, उपमेयर बिजय कृष्ण श्रेष्ठ लगायत जनप्रतिनिधि समेत सहभागी परिक्रमामा हजारौं मानिस पैदल नै हिडेर बालकरामलाई हौसला प्रदान गरिरहेका देखिन्थे ।

पशुपति जाने इच्छा बमोजिम थिमीमा जिब्रो छेडाएर हिडेका बलाकराम पशुपति पुग्दा करिब ११ बजेको थियो । उनलाई नेपाल सरकारका संस्कृती पर्यटन तथा नागरिक उड्डयन मन्त्री सुदन किराती र पशुपति बिकास कोषका पदाधिकारीले स्वागत गरेका थिए । जिब्रो छेडेको प्रत्यक्ष हेरेर पशुपतिमा स्वागत गर्न पुगेका मन्त्री किरातीले बालकरामले समाज र मानवको हित चिताएर आफ्नो जिब्रो छेड्ने साहसिक काम गरेकोप्रति धन्यवाद ज्ञापन गर्दै पशुपतिको चादीको कचौरामा राखिएको तोरीको तेललाई सुनको चम्चाले सुइरो छेडिएको जिब्रोमा हालेर संस्कृतीप्रति आदर र सम्मान प्रकट गरे ।

नगर परिक्रमा गरि राति ८ बजे पशुपतिनाथको मन्दिर तर्फ प्रस्थान गरेका बालकराम फर्कदा बिहानको ३ बजेको थियो । पशुपतिनाथको परिक्रमा गरी बालकुमारी मन्दिरमा पुगी कमीनायोले जिब्रोमा छेडेको सुइरो निकाले संगै जिब्रो छेड्ने जात्रा सम्पन्न भएको छ ।

इन्द्रजात्राको अवसरमा जिब्रो छेड्ने जात्रा नियमित हुन नसकेकोमा बालकरामले यसको निरन्तरतामा सहयोग गरी संस्कृती र परम्परा जोगाउने काम गरेको भन्दै मध्यपुर थिमि नगरपालिकाका उप प्रमुख विजय कृष्ण श्रेष्ठले बालकराम जस्ता सामाजसेवीहरु नगरका सम्पत्ति भएका बताए । उनले जात्रालाई एक शताब्दी पछि पशुपति सम्म पुर्याइएको जानकारी गराउदै जात्रा व्यवस्थान समिति र सहभागीलाई धन्यवाद ज्ञापन गर्दै मध्यपुरको जात्रालाई सम्मान गर्ने नेपाल सरकार र मन्त्री किराती प्रति आभार पनि प्रकट गरेका छन् ।