एमसीसी कम्प्याक्ट अनुमोदन गर्दा नेपालको संसदले गरेको ब्याख्यात्मक घोषणा स्वीकार गरिको मिलेनियम च्यालेञ्ज कर्पोरेसन (एमसीसी) मुख्यालयले स्पष्ट पारेको छ । मंगलबार काठमाडौंमा पत्रकारहरुसँग कुरा गर्दै एमसीसीकी प्रमुख कार्यकारी अधिकृत (सीईओ) एलिस अलब्राइटले एमसीसीले व्याख्यात्मक घोषणा स्वीकार गरिएको स्पष्ट पारेकी हुन् ।

‘नेपालको संसदले गरेको ब्याख्यात्मक घोषणाप्रति एमसीसी सहमत छ, हामीले त्यसलाई स्वीकार गरेका छौं ।’ उनले भनिन् । ‘हामीले यसबारे सरकारलाई बताइसकेका छौं । सोही अनुरूप एमसीसी कार्यान्वयनमा गएको छ ।’

केही समयअघि नेपालस्थित अमेरिकी दूतावासले समेत एमसीसीले व्याख्यात्मक घोषणा स्वीकार गरेको नोट जारी गरेको थियो ।

१५ फागुन २०७८ मा नेपालको संसदले एमसीसी सम्झौता अनुमोदन गर्नुअघि सत्तारुढ दलहरुभित्रै अनुमोदन गर्ने कि नगर्ने भन्ने विषयमा चर्को मतभेद भएपछि १२ बुँदे ब्याख्यात्मक घोषणा गरेर सम्झौता अनुमोदन गर्ने सहमति भएबमोजिम संसदले सोहीअनुसार अनुमोदन गरेको थियो ।

ब्याख्यात्मक घोषणासहित सम्झौता अनुमोदन भए पनि यसलाई एमसीसीले स्वीकार गर्दैन भन्ने एमसीसीका बिपक्षमा रहेकाहरुले बताइरहदा मंगलवार पत्रकार सम्मेलन मार्फत एमसीसीले आफ्नो स्वीकारोक्ति सार्वजनिक गरेको हो ।