देशमा संघीयता आएसंगै प्रादेशिक अस्पतालमा परिणत भक्तपुर अस्पतालले काचुली नै फेरेको छ । उपत्यकाकै दोश्रो जेठो अस्पताल भएपनि यसको बिकास हुन भने संघीयता नै आउनुपरेको हो ।

रिफर सेन्टरको रुपमा बदनाम रहेको भक्तपुर अस्पताललाई बागमती प्रदेश सरकारले उच्च प्राथमिकतामा राखेर यसको रुपरेखा नै फेरिदिएको छ । बागमती प्रदेश सरकार मातहत संचालनमा आएपछि स्थापनाको १ सय १६ वर्षपछि भक्तपुर अस्पतालले आइसीयु सेवा समेत शुरु गर्न सफल भयो । आधा दर्जन भेन्टिलेटरसहित आइसीयु सेवा संचालन गर्न सफल भएपछि यसको साख ह्वात्तै बढेको देखिन्छ । तत्कालिन मेसु डा सुमित्रा गौतमको नेतृत्वमा बिज्ञ चिकित्सक सहितको नियमित र विश्वासिलो उपचार सेवा पाउन थालेपछि भक्तपुरका बिरामीहरु मात्र नभई आसपासका जिल्लाका बिरामी पनि भक्तपुर अस्पतालप्रति आकर्षित हुन थालेका हुन् ।

दुरबिन प्रविधि बाट शल्यक्रिया, अल्जाइमर्स र मानसिक रोगको निशुल्क सेवा, मुख्यमन्त्री जनता कार्यक्रम मार्फत नसर्ने रोगको निशुल्क स्क्रिनिङ, सुविधासम्पन्न प्रसुती सेवा, एनआइसीयु, एचडियु लगायतका सेवाले गर्दा दिनहु करिब १ हजार बढी बिरामी भक्तपुर अस्पतालमा उपचार गर्न आउने गरेका छन् । गम्भीर प्रकृतीका बिरामीलाई अस्पतालसम्म सुरक्षित ल्याउन प्रदेश सरकारले भक्तपुर अस्पताललाई उच्च हेरचाह युक्त बेसिक लाइफ सपोर्ट एम्बुलेन्स समेत प्रदान गरेको छ ।

बिरामीहरुको चापलाई मध्यनजर गरी बागमती प्रदेश सरकारले भक्तपुर अस्पताललाई ३ सय शैयामा स्तरोन्नती गर्ने निर्णय गरेको छ । बागमती प्रदेश सरकारको मंगलवार बसेको मन्त्री परिषद बैठकले भक्तपुर अस्पताललाई ३ सय शैयामा स्तर उन्नती गर्ने निर्णय गरेको मुख्यमन्त्री शालिकराम जमरकट्टेलका प्रमुख राजनीतिक सल्लाहकार समेत रहेका भक्तपुरका नेता डिपी ढकालले पुष्टि गरेका छन् ।

यसै आर्थिक वर्षमा खरिद हुने गरी करिब ८ करोड मूल्यको सिटी स्क्यान मसिनका लागि भक्तपुर अस्पताललाई बजेट बिनियोजन समेत गराउन सफल भएका नेता ढकालले भक्तपुर अस्पताललाई ३ सय शैयामा स्तर उन्नती गरिएपछि उपचारका लागि स्थानीयले अन्यत्र जानुपर्ने बाध्यता अन्त्य हुने विश्वास व्यक्त गरेका छन् । स्वास्थ्य सेवालाई सबैको पहुँचमा पुर्याउने प्रदेश सरकारको नीति बमोजिम भक्तपुर अस्पताललाई ३ सय शैयामा स्तरोन्नती गर्न लागिएको उनले बताए ।

प्रदेश सरकार मातहत जानु अघि ७५ शैयाको अस्पताल हाल १ सय ८८ शैयाको सुविधा सम्पन्न अस्पतालको रुपमा संचालनमा रहेको छ । नयाँ भवन निर्माण सम्पन्नको चरणमा रहेको र पुरानोमा रेक्ट्रोफिटिङ्ग तथा मर्मत सम्भार समेत सकिएको बताउदै मेसु डा त्रिभुवन चन्द्र झाले प्रदेश सरकारको निर्णयले आफूहरु उत्साहित भएको बताएका छन् । शैयासंगै भौतिक संरचना, जनशक्ति र सेवासुविधा समेत थपिने हुँदा यसले भक्तपुर अस्पताललाई थप व्यवस्थित बनाउने उनले बताए ।

भक्तपुर अस्पताल बागमती प्रदेशकै सर्वोत्कृष्ट अस्पतालको रुपमा प्रदेश सरकारबाट पुरस्कृत समेत भैसकेको स्मरण गर्दै अस्पताल व्यवस्थापन समितिका अध्यक्ष रमण कायस्थले  प्रदेश सरकारको निर्देशन र स्थानीयको अपेक्षा अनुरुप भक्तपुर अस्पताललाई बिकासको ‘रोल मोडेल’ बनाउने र संघीयताले के गर्यो भन्नेहरुलाई भक्तपुर अस्पताल हेर्न बोलाउने बताएका छन् ।