चाँगुनारायण नगरपालिकाका मेयर जीवन खत्री जापान प्रस्थान गरेका छन् । बिपद् जोखिम न्यूनीकरण तथा ब्यवस्थापन बारे बुझ्न उनी आइतबार राति जापानतर्फ प्रस्थान गरेका हुन् ।

जापानी संस्था जाइकाको छनौटमा परी मेयर खत्री जापान प्रस्थान गरेका नगरपालिकाका बिपद् ब्यवस्थापन बिज्ञ दिनेश थापाले पुष्टि गरेका छन् । जाइकाको ज्ञान सहयोग कार्यक्रम अन्तर्गत अध्ययन भ्रमणका लागि चाँगुनारायण छनौट भएको र नगरपालिकाको प्रतिनिधित्व गर्दै प्रमुख खत्री अध्ययन भ्रमणमा सहभागी भएका थापाले जनाएका हुन् । जापानमा बिपद् जोखिम न्यूनीकरण तथा ब्यवस्थापन प्रणालीबारे अध्ययन गर्न र त्यहाँ गरिएको योजनाको स्थलगत निरीक्षण गर्न मेयर खत्रीले करिब २ साता जापानमा खर्चने चाँगुनारायणका बिपद् ब्यवस्थापन बिज्ञ दिनेश थापाले जानकारी गराएका छन् ।

पहिरोको जोखिममा रहेको चाँगुनारायणको पहिरो नियन्त्रणमा मेयर खत्रीको अध्ययन भ्रमणले महत्वपूर्ण उपलब्धी हासिल हुने बिश्वास ब्यक्त गरिएको छ । उनलाई बिदाइ गर्न नगरपालिकाका प्रवक्ता एवं ८ नम्बर वडाका वडाध्यक्ष जनक खत्री, वडा नम्बर १ का वडाध्यक्ष लगायत जनप्रतिनिधि एवं नेपाली कांग्रेस चाँगुनारायणका नेताकार्यकर्ता बिमानस्थल पुगेका थिए ।