मध्यपुर संचार समाजमा नयाँ नेतृत्व चयन भएको छ । शनिवार सम्पन्न १२ औं साधारण सभा एवं पाँचौं अधिवेशनले नयाँ नेतृत्व चयन गरेको हो ।

चन्द्रकृष्ण श्रेष्ठको अध्यक्षतामा नयाँ नेतृत्व निर्वाचित भएको निवर्तमान अध्यक्ष बाबुकाजी साँछे श्रेष्ठले बताएका छन् । सिंगो कार्यसमिति नै निर्विरोध निर्वाचित भएको उनले जानकारी गराए ।

नयाँ कार्यसमितिको उपाध्यक्षमा सागर गुरागाईं, सचिवमा सुमन श्रेष्ठ, सहसचिवमा पृथ्वीराम श्रेष्ठ र कोषाध्यक्षमा सरिना श्रेष्ठ निर्वाचित भएका छन् । सदस्यहरुमा विश्वेश्वर श्रेष्ठ, रेणु श्रेष्ठ, सुरेश ख्वाक श्रेष्ठ, विज्ञान भक्त श्रेष्ठ र रत्नकाजी प्रजापति निर्वाचित भएका बताइएको छ ।

शनिवार निर्वाचन मण्डलका संयोजक रहेका अधिवक्ता तुइलाल श्रेष्ठले नव निर्वाचित कार्यसमितिलाई प्रमाणपत्र प्रदान गरेका छन् ।

१२ औं साधारण सभा एवं पाँचौं अधिवेशनको अवसर पारेर मध्यपुर संचार समाजले दुई जनालाई सम्मान समेत गरेको छ । सम्मानित हुनेहरुमा मध्यपुर थिमि नगरपालिकाका पूर्व प्रमुख मदन सुन्दर श्रेष्ठ र मध्यपुर थिमिका पत्रकार रत्न कृष्ण श्रेष्ठ रहेका छन् ।

पूर्व नगर प्रमुख मदन सुन्दर श्रेष्ठलाई मूर्त अमूर्त कला र संस्कृतीको संरक्षण र प्रवर्द्धनमा योगदान गरेवापत सम्मानित गरिएको उपाध्यक्ष सागर गुरागाईंले जनाएका छन् । त्यसैगरी फोटो पत्रकार रत्न कृष्ण श्रेष्ठलाई फोटो पत्रकारिताको माध्यमबाट मध्यपुर थिमि लाई देश बिदेशमा चिनाउन योगदान गरेवापत ५ हजार राशीको थिम्रिंग पत्रकारिता पुरस्कारसहित पुरस्कृत गरिएको उनले जानकारी गराए ।

मध्यपुर थिमिका जिवित साँस्कृतिक गुरु गोपाल प्रजापतिले उनीहरुलाई सम्मान पत्र प्रदान गरेका थिए । उक्त अवसरमा नेपाल पत्रकार महासंघ भक्तपुरका अध्यक्ष जगत कृष्ण प्रजापति, शिक्षाकर्मी, व्यवसायी एवं समाजसेवी चन्दन कृष्ण श्रेष्ठ, समाजसेवी कृष्णलाल गोजा, चाणक्य कलेजका प्राचार्य गणेशप्रसाद पोखरेल लगायतको आतिथ्यता रहेको थियो ।