![](https://bhaktapurpost.com/wp-content/themes/onlineparda/images/1px.gif)
नेकपा एमालेको भक्तपुर जिल्ला कमिटीमा नयाँ नेतृत्व चयनका लागि निर्वाचन हुने भएको छ । सल्लाघारीस्थित इम्पेरीयल बैंक्वेटमा जारी ९ औं जिल्ला अधिवेशनले सर्वसम्मत नेतृत्व छान्न नसकेपछि शनिवार मतदानमार्फत नेतृत्व चयन गर्न निर्वाचन हुने भएको हो ।
जिल्ला अध्यक्ष बचन देउजा र सचिव मोहनवीर श्रेष्ठले अध्यक्षमा उम्मेद्वारी दिएका छन् । एमालेको केन्द्रीय निर्देशन बमोजिम जिल्लामा प्यानल प्रस्तुत नभएपनि अन्य पदाधिकारीमा पनि अघोषित प्यानल उम्मेद्वारी परेको छ ।
देउजा प्यानलबाट उपाध्यक्षमा सूर्यविनायक नगरपालिकाका प्रमुख समेत रहेका निवर्तमान उपाध्यक्ष बासुदेव थापाले उम्मेद्वारी दिएका छन् । त्यसैगरी सचिवमा विष्णु तामाङ्ग, उपसचिवमा सानुकाजी कायस्थ र सुचित्रा श्रेष्ठको उम्मेद्वारी परेको बताइएको छ ।
अध्यक्ष प्रत्यासी मोहनवीर श्रेष्ठ प्यानलबाट उपाध्यक्षमा बागमती प्रदेश सभा सदस्य समेत रहेका किरण थापामगरले उम्मेद्वारी दिएका छन् । त्यसैगरी सचिवमा शम्भु दाहाल, सहसचिवमा राजकुमार जोशी र उत्तरा नेपालको उम्मेद्वारी परेको बताइएको छ । सूर्यविनायक नगरपालिकाकी पूर्व उपप्रमुख जुना बस्नेतले पनि उपसचिव पदमा उम्मेद्वारी दिएकी छन् ।
जेठ ३ र ४ गतेका लागि तय भएको अधिवेशन नेतृत्व चयन गर्न नसक्दा एक दिन लम्बिएको छ । शनिवार बिहान ११ बजे सूर्यविनायक-५ सल्लाघारीस्थित इम्पेरीयल बैंक्वेटमा मतदान शुरु हुने प्रचार बिभागका सचिव हेमराज ढकालले पुष्टि गरेका छन् ।
शनिवार निर्वाचन सम्पन्न गरी नयाँ कार्यसमिति निर्वाचित हुने प्रचार बिभाग प्रमुख निरन्जन बजगाईले बताएका छन् । प्रत्येक वडाबाट सदस्य संख्याको आधारमा र जिल्लामा क्रियाशील १८ वटा जनवर्गीय संगठन र सल्लाहकारबाट समेत गरी कुल ४ सय ९८ जना अधिवेशन प्रतिनिधि चयन भै आएका र उनीहरु मतदानमा सामेल हुने बजगाईले बताए ।
अधिवेशन प्रतिनिधि छान्ने विषयमा जिल्लाका ३८ वडा कमिटी मध्ये ३५ वडामा सर्वसम्मत भएको र ३ वटा वडामा भने निर्वाचन नै गर्नुपरेको थियो । ४ नगर मध्ये देउजा प्यानलमा २ र श्रेष्ठ प्यानलमा २ नगर अध्यक्ष उभिएका छन् ।
निर्वाचनमा २ वटा प्रष्ट प्यानल देखिएको छ र जिल्लाका नेताकार्यकर्ता पनि २ प्यानलमा बाडिएका छन् । यो प्यानल निर्वाचन अघि नै प्रतिनिधि छनौट गर्ने समयमै देखा परिसकेको थियो । जिल्लामा सर्वसम्मत नेतृत्व नआउने देखेपछि भक्तपुरकै बालकोट निवासी एमालेका केन्द्रीय अध्यक्ष एवं पूर्व प्रधानमन्त्री केपी शर्मा ओली अधिवेशन उद्घाटन गर्न नआएका उनी निकट श्रोतले जनाएको छ । महासचिव ईश्वर पोखरेलले भक्तपुरको ९ औं अधिवेशन उद्घाटन गरेका थिए ।
मूख्यत: पूर्व मन्त्री समेत रहेका पोलिटब्युरो सदस्य महेश बस्नेत र सूर्यविनायक नगरपालिकाका प्रमुख समेत रहेका जिल्ला उपाध्यक्ष बासुदेव थापाबीचको तीक्ततापूर्ण सम्बन्ध अधिवेशन सम्म आइपुग्दा छताछुल्ल भएको छ । उपाध्यक्ष थापा देउजालाई दोहोर्याउने पक्षमा उभिएपछि देउजालाई अध्यक्ष बनाउन बिगतमा लागिपरेका बस्नेत यसपटक देउजा बिरोधि समुहको नेतृत्व गर्न पुगेका छन् ।
केन्द्रमा आफ्नो प्रभाव पार्न एकअर्काको विपक्षमा लाग्ने गरेका पोलिटब्युरो सदस्य बस्नेत, केन्द्रीय सदस्य सोमप्रसाद मिश्र र प्रभावशाली नेता निर्मल भट्टराईलाई यो अधिवेशनले भने एकै ठाउँमा ल्याइपुर्याएको छ र उनीहरु देउजाको बिकल्प खोजिरहेका छन् । यद्यपी बस्नेतको उदेश्य देउजाको विपक्षमा भन्दा बढी थापाको जिल्ला पार्टीमा बढ्दो प्रभाव रोक्न केन्द्रीत भएको बताइन्छ ।
केन्द्रीय नेताहरुको एकताको हिसावले देउजा समुह कमजोर देखिएपनि पार्टी भित्रकै बस्नेत बिरोधी केन्द्रीय नेताहरुको साथ् र सहयोगका कारण देउजा डगमगाएक छैनन । क्रियाशीलता, मिजासिलो स्वभाव र नेतृत्वमा रहेर सबैको नाडी छामिसकेका कारण उनलाई परास्त गर्न बैकल्पिक नेतृत्वलाई फलामकै चिउरा चपाउनुपर्ने एमाले वृत्तमा चर्चा चलेको छ । जिल्लाका ठुला नेताको साथ् पाएका मोहनवीर पनि राजनीतिका पुराना खेलाडी भएका कारण देउजालाई चुनाव जित्न सजिलो नहुने आकलन गरिएको छ ।
निर्वाचनमा उपाध्यक्ष पदको प्रतिष्पर्धा सबैभन्दा बढी रोमाञ्चक रहेको एक अधिवेशन प्रतिनिधिले बताएका छन् । सूर्यविनायक नगरपालिकाका प्रमुख समेत रहेका बासुदेव थापालाई परास्त गर्न श्रेष्ठ प्यानलले उठाएका उम्मेदवार किरण थापामगर पनि बागमती प्रदेश सभा सदस्य हुन् । उनीहरु दुबै पार्टी बिधान बमोजिम कार्यकारी पदमा जान नपाउने भएपछि एकै पद उपाध्यक्ष रोजेका छन् । दुवै हेभिवेट भएकाले चुनावी प्रतिस्पर्धा हेर्न लायक रहेको छ ।
निर्वाचनले ५ पदाधिकारी सहित १ सय ५ सदस्यीय नयाँ कार्यसमिति निर्वाचित गर्ने छ । यो कमिटी कार्यकारी रहने र आगामी स्थानीय, प्रदेश र संघको उम्मेदवार चयनमा निर्णायक रहने भएकाले पनि यसलाई आफ्नो पक्षमा पार्न नेताकार्यकर्ता दिलोज्यानले लागिपरेका एक एमाले नेताले जानकारी दिए ।