भक्तपुर, १३ जेठ २०८१भक्तपुरको सूर्यविनायक- ४ दधिकोट निवासी लोकनाथ घिमिरेलाई उत्कृष्ट मानव अधिकार सेवा पुरस्कार प्रदान गरिएको छ । राष्ट्रिय मानव अधिकार आयोगले आफ्नो २४ औं स्थापना दिवसका अवसरमा आयोजित कार्यक्रममा आइतवार उनलाई पुरस्कृत गरेको हो ।
घिमिरे आयोगमा रहेर विगत १५ वर्षदेखि मानव अधिकारको संरक्षण र संवर्द्धनमा निरन्तर सेवा पुर्याइरहेका कर्मचारी हुन् । उनी हाल राष्ट्रिय मानव अधिकार आयोगको बागमती प्रदेश कार्यालय हेटौडामा कार्यरत छन् ।
कानून, न्याय तथा संसदीय मामिला मन्त्री पदम गिरी र आयोगका अध्यक्ष तपबहादुर मगरले घिमिरेलाई पुरस्कार प्रदान गरेका थिए । सो अवसरमा आयोगले ४ कर्मचारीलाई पुरस्कारबाट सम्मानित गरेको थियो । सर्वोत्कृष्ट मानव अधिकार सेवा पुरस्कार बाट भने आयोगका सहसचिव नवराज सापकोटा सम्मानित भएका छन् । यो सम्मानले कर्मचारीहरुलाई थप उत्प्रेरित बनाई मानव अधिकारको संरक्षण र संवर्द्धनमा अझै बढी सक्रिय हुन हौसला प्रदान गर्ने उनीहरुले विश्वास व्यक्त गरेका छन् ।