जिल्ला प्रशासन कार्यालय भक्तपुरकी प्रमुख जिल्ला अधिकारी(सिडिओ) रोशनी कुमारी श्रेष्ठले कार्यालयमा सेवा लिन आउने जेष्ठ नागरिकका लागि निशुल्क ‘स्वास्थ्य सेवा कक्ष’ संचालनमा ल्याएको जानकारी गराएकी छन् । आइतवार देखि कार्यालयमा सेवा लिन आउने जेष्ठ नागरिकका लागि निशुल्क ‘स्वास्थ्य सेवा कक्ष’ संचालन हुने उनले जानकारी गराएकी हुन् ।

आयुर्वेद तथा वैकल्पिक चिकित्सालय भक्तपुरले आयोजना गरेको एक समीक्षा एवं अन्तरक्रिया कार्यक्रमलाई सम्बोधन गर्दै सिडिओ श्रेष्ठले आइतवारबाटै ‘स्वास्थ्य सेवा कक्ष’ स्थापना हुने र त्यसले जेष्ठ नागरिकको लागि आधारभूत स्वास्थ्य सेवा सुनिश्चित गर्ने स्पष्ट पारिन् । आयुर्वेद तथा वैकल्पिक चिकित्सालय भक्तपुरले सो डेस्क संचालनको जिम्मा लिएको समेत उनले जानकारी दिएकी छन् ।

सो अवसरमा सिडिओ श्रेष्ठले सीमित श्रोत र साधनका बाबजुद आयुर्वेद चिकित्सालयले प्रभावकारी सेवा प्रवाह गरेको बताउदै आयुर्वेद प्रति बढ्दो आकर्षणलाई गुणस्तरीय सेवाले थप अभिवृद्धि गर्न निर्देशन गरेकी थिइन् ।

धेरैजनाको किड्नी जस्ता अंग प्रत्यारोपण गर्नुपर्ने समस्या,क्यान्सर जस्ता असाध्य रोगको बढ्दो दुरावस्था लगायतमा चर्चा गर्दै उनले बाँच्ने जीवनशैली जटिलतातिर गईरहेकोप्रति चिन्ता व्यक्त गरिन । उनले स्वस्थ जीवनशैली सिकाउने र रोगबाट बचाउने एक विज्ञानको रुपमा बिकसित आयुर्वेदलाई पाठ्यपुस्तकमै समावेश गरी महत्वका साथ् जनचेतना जागृत गर्नुपर्नेमा जोड दिइन ।

कार्यक्रममा चिकित्सालयका प्रमुख डा. नदन कँडेलले स्वस्थ जीवन सम्बन्धी प्रस्तुतीकरण दिएका थिए । आयुर्वेदले रोग लाग्न नदिने र लागेपछि निको पार्ने विषयमा प्रस्तुति केन्द्रीत रहेको थियो ।

अन्तरक्रियामा तीनै तहका सरकारको सहकार्य भन्दा पन्छाउने प्रवृत्ति प्रति निराशा व्यक्त गर्दै स्वास्थ्य सेवाको नीति र व्यवहार एकआपसमा बाँझिएको कार्यालय प्रमुख कँडेलले गुनासो गरेका छन् ।

सो अवसरमा सहायक सिडिओ डोरेन्द्रप्रसाद निरौला, जिल्ला हुलाक कार्यालयकी प्रमुख सीता राई, पत्रकार महासंघ भक्तपुरका अध्यक्ष जगतकृष्ण प्रजापति लगायत २ दर्जन पत्रकारको सहभागिता रहेको थियो ।