अविरल वर्षाका कारण भक्तपुर हुँदै बहने नदीहरुमा बाढी आएको छ । बाढी बस्तीमा पस्ने जोखिम बढ्दै गएको देखिन्छ ।

हनुमन्ते खोलाले आसपासका मठमन्दिर, पाटीसत्तल र विद्यालयलाई समेत डुबान ग्रस्त बनाएको छ । यद्यपि बिगतमा जस्तो सल्लाघारी र राधेराधे क्षेत्रमा भने समाचार तयार पार्दा सम्म पानी पसिसकेको छैन ।

मनोहरा करिडोर बन्न नसक्दा सो क्षेत्रमा पनि डुबानको सम्भावना बढेको छ । यद्यपि केही दिन अघि स्काभेटरले माटो उठाएका कारण स्थानीयले राहत महसुस गरिरहेका छन् ।

पाङ्गो माटो थिग्रीएर नदीमै रहने र फोहोर लेदो लगायतले नदीको सतह माथि आएको कारण नदीहरु डुबानको कारक बन्दै गएका छन् । वर्षा संगै नदी आसपासका स्थानीय हरेक वर्ष डुबानको चिन्ताले चिन्तित बन्दै आएका छन् ।

जल तथा मौसम बिज्ञान बिभागले एक सूचना जारी गर्दै भक्तपुरका हनुमन्ते र मनोहरा लगायत नदी आसपासका बासीन्दालाई उच्च सतर्कता अपनाउन सूचना जारी गरेको छ । जिल्ला विपत ब्यवस्थापन समितिकी अध्यक्ष एवम् प्रमुख जिल्ला अधिकारी रोशनीकुमारी श्रेष्ठले बाढी बाट बच्न र जोखिमबारे जानकारी गराउन आग्रह गरेकी छन् । जनधनको क्षति हुन नदिन उद्दारका लागि सुरक्षा निकाय र स्वयंसेवक तयारी अवस्थामा रहेका समेत उनको भनाइ छ ।