बागमती प्रदेश सरकारका स्वास्थ्य मन्त्री किरण थापाले भक्तपुरमा स्वास्थ्य विज्ञान प्रतिष्ठान बनाउन पहल गर्ने बताएका छन् । भक्तपुरका ३ ठुला अस्पताललाई एकीकृत गरी प्रतिष्ठान बनाउन पहल गर्ने उनले बताएका हुन् ।

प्रेस चौतारी नेपालको भक्तपुर शाखाले शनिवार आयोजना गरेको बधाई एवं शुभकामना ज्ञापन कार्यक्रमलाई सम्बोधन गर्दै मन्त्री थापाले भने, ”भक्तपुर अस्पताल, भक्तपुर क्यान्सर अस्पताल र शहिद धर्मभक्त मानव अंग प्रत्यारोपण केन्द्रलाई एकीकृत गरी भक्तपुर स्वास्थ्य विज्ञान प्रतिष्ठान बनाउन पहल गर्छु ।” विगतमा प्रतिष्ठान बनाउन नसक्दा तीनैवटा अस्पतालको अपेक्षित बिकास हुन नसकेको उनले बताए । ”इमान्दारिताका साथ् पहल गर्छु, सबैको साथ् रहेमा अवश्य सम्भव हुनेछ ।” उनले भने ।

नेकपा(एमाले)का जिल्ला उपाध्यक्ष समेत रहेका मन्त्री थापाले भक्तपुरका १७ वटै अस्पतालको बिकासमा भूमिका निभाउने भन्दै जिल्लालाई स्वास्थ्यको हव बनाउने पनि बताए । भक्तपुरका मात्र होइन, उपचारका लागि जिल्ला बाहिरका बिरामीको पनि रोजाइको केन्द्र भक्तपुरलाई बनाउने उनले बताएका छन् ।

सो अवसरमा मन्त्री थापाले बागमती प्रदेशका हरेक जिल्लाले महसुस गर्नेगरी स्वास्थ्यमा सुधार गर्दै जाने जिकिर गरे । कुनैपनि गलत काम नगर्ने र आफूले भक्तपुरको शिर उचो राख्ने उनको भनाइ छ । ”कार्यभार सम्हालेको पहिलो दिन नै प्रदेशाबासी क्यान्सर बिरामीलाई दिंदै आएको रकम दोब्बर बनाउने निर्णय लिएको छु ।” उनले भने ।

कार्यक्रममा मन्त्री थापाले भक्तपुरका पत्रकार संग महिनाको एक पल्ट भेट्ने र सुझाव लिने समेत बताए । देशको चौथो अंगको रुपमा रहेका पत्रकारलाई लक्षित गरी स्वास्थ्य कार्यक्रम अघि सार्ने समेत उनले संकेत गरेका छन् ।

निजी सचिव पनि जिल्लावासी नै नियुक्त गरेका मन्त्री थापाले स्वास्थ्य बाहेकका क्षेत्रमा पनि आफूले उत्तिकै ध्यान दिने प्रतिवद्धता प्रकट गरेका छन् । गुण्डुमा यातायात व्यवस्था कार्यालय सार्ने देखि जिलास्थित विद्यालयको गुणस्तर वृद्धिसम्ममा आफूले ध्यान दिने उनले बताए ।

कार्यक्रममा नेपाल पत्रकार महासंघ भक्तपुरका अध्यक्ष जगतकृष्ण प्रजापतिले भक्तपुर अस्पतालले महासंघका सदस्यलाई होलबडी चेकअपको सुविधा प्रदान गरेजस्तै प्रदेशभरीकै पत्रकारलाई विशेष स्वास्थ्य कार्यक्रम मार्फत सेवाको पहल गरिदिन ध्यानाकर्षण गराएका थिए ।

त्यसैगरी महासंघका उपाध्यक्ष सुन्दर सिल्पकारले भक्तपुर क्यान्सर अस्पताल सूर्यविनायक नगर अस्पतालको अवस्थाबारे ध्यानाकर्षण गराए । सचिव संजीप शुभचिन्तकले पूरा गर्न नसक्ने आस्वासन बाडेर अनावश्यक बोझ नबोक्न सुझाव दिए । सदस्यद्वय हरिसुन्दर छुकां र संजीव दुलाल, स्वतन्त्र पत्रकार कृष्ण किसी, पत्रकार रत्न प्रजापति र सुनिता थापा लगायतले पनि बिबिध जिज्ञासा राखेका थिए ।

प्रेस चौतारी भक्तपुरका इन्चार्ज रमेश गिरीको अध्यक्षतामा सम्पन्न कार्यक्रमको संचालन अध्यक्ष हेमराज ढकालले गरेका थिए । कार्यक्रममा पत्रकार महासंघ भक्तपुरकी उपाध्यक्ष लिला श्रेष्ठ, पूर्व अध्यक्ष पुष्करराज बुढाथोकी, केन्द्रीय परिषद सदस्य पेशल आचार्य त्यसैगरी चौतारीका केन्द्रीय सदस्यहरु कविता अधिकारी, आरसी प्रजापति, भगवती थापा र पत्रकार बिरेन चम्लागाई लगायतको उपस्थिति रहेको थियो ।

सो अवसरमा मन्त्री थापाका निजी सचिव डा नरेन्द्रप्रसाद गिरी र स्वकीय सचिव संजीव थापाको समेत आतिथ्यता रहेको चौतारीकर्मी सृजना खतिवडाले जनाएकी छन् ।