व्यवसायी सुरज वैद्यले चाँगुनारायण क्षेत्रमा उत्पादन हुने एभोकाड़ोको बजारीकरणमा सहयोग गर्ने बताएका छन् । वैद्य नेपाल उद्योग वाणिज्य महासंघका पूर्व केन्द्रीय अध्यक्ष एवं टोयटा कम्पनीको नेपालको लागि आधिकारिक विक्रेता हुन् ।

‘चाँगुनारायण सिटी एभोकाड़ो सिटी’ का परिकल्पनाकार एवं अर्थ-राजनीतिका विज्ञ डिपी ढकालसंग मंगलवार कुरा गर्दै व्यवसायी बैद्यले उत्पादन नै सम्वृद्धिको आधार भएकोले आफू अभियानलाई सहयोग गर्न तयार रहेको बताए । युवाहरुले आफ्नो क्षेत्रलाई सम्वृद्ध गर्नसके देश सम्वृद्ध बन्दै जाने बताउदैं उनले ढकालको काम अनुकरणीय रहेको पनि उल्लेख गरेका छन् ।

कृषकले नै आफ्ना छोराछोरीलाई कृषक बनाउन नचाहने अवस्था प्रति चिन्ता व्यक्त गर्दै व्यवसायी वैद्यले कृषिमा वैदेशिक लगानीसमेत भित्राउने र देशमा कृषि उत्पादन बढाउने लक्षसहित आफूले वृद्धि परियोजना संचालन गर्ने खुलासा समेत गरेका छन् ।

त्यसैगरी उनले चाँगुनारायणका गृहिणी महिलाई स्वरोजगार र सीपयुक्त बनाउन आफ्नो तर्फबाट सक्दो सहयोग गर्ने प्रतिवद्धता पनि प्रकट गरे ।

सो अवसरमा चाँगुनारायण सिटी, एभोकाड़ो सिटी अभियानका परिकल्पनाकार रहेका नेता डिपी ढकालले एभोकाड़ो फल्न थालेपछि बजार नपाउला कि भन्ने चिन्ता समाप्त भएको बताए । नेपाल उद्योग वाणिज्य महासंघका पूर्व केन्द्रीय अध्यक्ष रहिसकेका प्रतिष्ठित राष्ट्रिय व्यवसायीले चाँगुनारायणमा संचालित आफूहरुको अभियानलाई सहयोग गर्ने आश्वासन दिनु नै ठुलो उपलब्धी भएको उनको भनाइ छ ।

भेटघाटमा स्वरोजगार र शिपयुक्त महिला अभियान, राष्ट्रिय उत्पादन वृद्धि अभियान लगायतका विषयमा समेत छलफल भएका छन् । सो अवसरमा वृद्धि अभियानकी निर्देशक सृष्टि शाक्य र नेपाल पत्रकार महासंघ भक्तपुरका सचिव एवं ‘चाँगुनारायण सिटी एभोकाड़ो सिटी’ अभियानका प्रवक्ता संजीप घिमिरे शुभचिन्तकको समेत उपस्थिति रहेको थियो ।

के हो चाँगुनारायण सिटी, एभोकाड़ो सिटी अभियान
भक्तपुरको चाँगुनारायण नगर क्षेत्रलाई बहुगुणी फल एभोकाड़ोयुक्त बनाउने नागरिक अभियान चाँगुनारायण सिटी एभोकाडो सिटी अभियान हो । ‘एक घर, दुई एभोकाड़ो’ भन्ने लक्षसहित संचालित यो अभियानका परिकल्पनाकार एवं संरक्षक नेता डिपी ढकाल हुन् । उनको परिकल्पना लाई पत्याएर सयौं अभियन्ता स्वत;स्फूर्त रुपले यस अभियानमा जोडिएका छन् ।

नागरिक स्तरमा संचालित ३ वर्षे यो अभियान गत वर्ष बाट शुरु भएको हो । अभियानले २ वर्षमै १६ हजार ३ सय बोट एभोकाडो वितरण र रोपण कार्य सम्पन्न गरेको छ ।

के हो एभोकाडो
नेपालमा सोखले रोपिने एभोकाडो एक मीठो र महँगो घिउफल हो । केही वर्ष यता यसलाई व्यवसायिक रुपले रोपिने क्रम बढ्न थालेको छ ।

प्रशस्त भिटामिन, प्रोटिन र चिल्लो पदार्थ पाइने एभोकाडोको माग नेपालमा बढ्दै गएको छ भने विदेश समेत निर्यात गर्न सकिने भएकोले बजार नपाउने समस्या छैन । एभोकाडोको एउटा बोटले तीन क्विन्टलसम्म फल दिने र वार्षिक पचास हजार सम्म आम्दानी हुने बताइन्छ ।

एभोकाडोको बोट मद्यम उचाइको हुने र सदाबहार हरियो रहने हुँदा यसले घर र शहरको सौन्दर्य बढाउँन, स्वच्छ वायु प्रवाह गर्न र वातावरण जोगाउन समेत मद्दत गर्दछ ।