भक्तपुर, १४ भदौ २०८१राष्ट्रपति रामचन्द्र पौडेलले भक्तपुर दरवार क्षेत्रको अवलोकन भ्रमण र स्थानीय तलेजु भवानी र भैरवनाथको पूजाअर्चना गरेका छन् । शुक्रवार बिहान करिब ११ बजे धर्मपत्नी एवं प्रथम महिला सविता पौडेलका साथ सुटुक्क भक्तपुर आएका उनले अवलोकन एवं पूजा अर्चना गरेका हुन् ।
कुनै तामझाम र औपचारिक कार्यक्रम बिना आएका राष्ट्रपति पौडेलले दरवार संग्रहालय र त:मारीस्थित ङातापोला (पाँच तले मन्दिर) को पनि अवलोकन गरे ।
भक्तपुरमा करिब १ घण्टा बिताएका राष्ट्रपति पौडेललाई भक्तपुरका प्रतिनिधि सभा सदस्य दुर्लभ थापा र सिडिओ रोशनीकुमारी श्रेष्ठले स्वागत गरेका थिए । सो अवसरमा मध्यपुर थिमिका नगरपालिका प्रमुख सुरेन्द्र श्रेष्ठ र चाँगुनारायण नगरपालिका प्रमुख जीवन खत्रीको उपस्थिति रहेको थियो ।
भक्तपुर नगरपालिकाको तर्फबाट गौतम लासिवाले राष्ट्रपति पौडेललाई दरवार क्षेत्रका बिबिध सम्पदा बारे बताएका थिए भने गुठी सस्थान भक्तपुरकी प्रमुख खिमा ओलीले पूजाअर्चनाको ब्यवस्था मिलाएकी थिइन ।
“सार्वजनिकस्थलमा राष्ट्रपति”भन्ने कार्यक्रम शुरु गरिएको र सोही अन्तर्गत पहिलो कार्यक्रम भक्तपुरमा सम्पन्न गरिएको राष्ट्रपति पौडेलका प्रमुख प्रेस सल्लाहकार किरण पोखरेलले जनाएका छन् । राष्ट्रपतिलाई जनतासंग जोड्न कार्यक्रमले सहयोग गर्ने उनले बिश्वास ब्यक्त गरे ।
राष्ट्रपति पौडेलकी छोरी एवं स्वकीय सचिव अध्यक्षता पौडेलले राष्ट्रपति पौडेलले धार्मिक, सांंस्कृतिक एवं पर्यटकीय नगर भक्तपुरको भ्रमणप्रति आनन्द अनुभुती गरेका बताइन् ।
औपचारिक कार्यक्रम नभएकोले भिडभाड नभएको र आम नागरिक जस्तै राष्ट्रपति पौडेलले भक्तपुर अवलोकन गरेको देख्दा स्थानीय र पर्यटकहरु अचम्मित थिए । सो क्रममा राष्ट्रपति पौडेलले स्थानीयसंग कुराकानी गर्नुका साथै स्थानीयको गुनासो समेत सुनेका थिए ।
अनौपचारिक कार्यक्रम भएकोले नजिक आउन चाहने र कुरा राख्न खोज्ने सर्वसाधारणलाई नरोक्न उनले सुरक्षाकर्मीलाई निर्देशन दिएका कारण जनतासंग राष्ट्रप्रमुख नजिकिएको अनुभुती भएको नेपाल पत्रकार महासंघ भक्तपुरका अध्यक्ष जगत कृृृष्ण प्रजापतिले प्रतिक्रिया दिएका छन् ।