भक्तपुर, २० भदौ २०८१धुलिखेल-खावा सडक खण्डमा दुई दिन मालवाहक गाडी नचलाउन सडक डिभिजन भक्तपुरले सूचना जारी गरेको छ । आज भदौं २० र भोलि २१ गतेका लागि सो सूचना जारी गरिएको हो ।
धुलिखेल-खावा सडक अत्यन्तै जीर्ण भएकोले मर्मत सम्भार गर्न २ दिन मालवाहक गाडी बन्द गर्नुपरेको सडक डिभिजन भक्तपुरका प्रमुख सि.डि.ई. मेघराज मरासिनीले बताएका हुन् । ट्रिपर लगायत मालबाहक सवारी साधन २ दिन बन्द गरी सडक मर्मतमा सहयोग गरिदिन उनले भक्तपुर पोस्ट मार्फत आग्रह पनि गरेका छन् ।
जिल्ला प्रहरी कार्यालय काभ्रेका सूचना अधिकारी रहेका डिएसपी राजकुमार श्रेष्ठले सडक मर्मतका लागि आज र भोलि शुक्रवारसम्म मालबाहक सवारी चलाउन बन्देज गरिएको बताउदै अटेर गर्नेलाई कारवाही गरिने समेत जानकारी गराए ।
वर्षाको कारण धुलिखेल-खावा सडक हिलाम्मे हुँदा यात्रुलाई असहज त भएको छ नै, अरनिको राजमार्गमा दुईतर्फी रुपमै यातायात अवरुद्ध समेत हुँदै आएको छ । आइतबार ७ घण्टा यातायात अवरुद्ध भएपछि सडक मर्मतको प्रेसर परेको हो । यस अघि जेठमा पनि दैनिक ४ घण्टा यातायात बन्द गरी एक सातासम्म सडक मर्मत गरिएको थियो ।