भक्तपुर, २० भदौ २०८१भक्तपुर नगरपालिकाको अस्पताल ख्वप: अस्पताल सञ्चालनमा समस्या उत्पन्न भएको छ । सरकारले स्वास्थ्य बीमाको रकम भुक्तानीमा ढिलाइ गर्दा अस्पताल सञ्चालनमा समस्या उत्पन्न भएको हो ।
सो बारे नगरपालिका प्रमुख सुनिल प्रजापतिले नेपाल सरकार स्वास्थ्य बीमा बोर्डलाई अवगत गराएका हुन् । बोर्डका अध्यक्ष गुणराज लोहनीसँग बिहीबार भेटेर प्रमुख प्रजापतिले स्वास्थ्य बीमाको रकम समयमै भुक्तानी गर्न आग्रह गरेका उनको सचिवालयकी किर्तिका प्रजापतिले जनाएकी छन् ।
“बीमा बोर्डसँग ख्वप अस्पतालले रु. २० करोडभन्दा बढी रकम सोधभर्ना हुन बाँकी रहेकोले प्रमुख प्रजापतिले शिघ्र भुक्तानीको लागि ध्यानाकर्षण गराउनु भयो ।” सचिवालयको भनाइ छ ।
सो अवसरमा स्वास्थ्य बीमा बोर्डका अध्यक्ष गुणराज लोहनीले ख्वप अस्पताललाई स्वास्थ्य बीमा अन्तर्गत सोधभर्ना हुन बाँकी रकममध्ये कम्तीमा ५० प्रतिशत रकम एक महिनाभित्र भुक्तानी दिने प्रतिबद्धता प्रकट गरेका बताइएको छ ।
भेटकै क्रममा स्वास्थ्य बीमा बोर्डका कार्यकारी निर्देशक दामोदर बसौलाले स्वास्थ्य बीमा बोर्डसँग पैसा नभएकै कारण अस्पतालहरुलाई स्वास्थ्य बीमाको रकम भुक्तानी दिन नसकेको प्रष्ट पारेका थिए ।
स्वास्थ्य मन्त्रालयमार्फत अर्थमन्त्रालयसँग रु. ८ अर्ब ७५ करोड माग गरेको बताउँदै बसौलाले अस्पतालहरुलाई सक्दो चाँडो स्वास्थ्य बीमाको रकम सोधभर्ना गरिने बताए ।
ख्वप अस्पताल व्यवस्थापन समितिका सदस्य एवम् भनपा वडा नं. २ का वडाध्यक्ष हरिप्रसाद बासुकला र अस्पतालका निमित्त मेडिकल डाइरेक्टर डा. मजेशप्रताप मल्ललगायतका प्रतिनिधिमण्डल बीमा बोर्ड पुगेका बताइएको छ ।
भक्तपुर नगरपालिका मातहत रहेको ख्वप अस्पताल च्यामासिंहमा अवस्थित छ । एक सय सैयाको यो अस्पताल सेवाग्राहीलाई सस्तो, सुलभ र गुणस्तरीय स्वास्थ्य उपचार सेवा प्रदान गर्न प्रतिवद्ध देखिन्छ ।
शिक्षा र स्वास्थ्यको क्षेत्रमा देशकै नमूना काम गरिरहेको भक्तपुर नगरपालिकाले स्थानीयलाई स्वास्थ्य सेवामा पहुँच पुर्याउन ख्वप अस्पताललाई महत्वका साथ बिकास गरिरहेको छ । अस्पतालले दैनिक करिब ८ सय जना बिरामीलाई स्वास्थ्य सेवा प्रदान गर्दै आएको छ ।