भक्तपुर, २४ भदौ २०८१नेपालका प्रथम जन निर्वाचित प्रधानमन्त्री विश्वेश्वरप्रसाद कोइरालाको स्मरणमा भक्तपुर कांग्रेसले बृक्षारोपण गरेको छ । नेपाली कांग्रेसका संस्थापक नेता नेता विपिको १ सय १ औं जन्म जयन्तीमा बृक्षारोपण गरिएको हो ।
सोमवार नेपाली कांग्रेस भक्तपुरले पार्टीको निर्माधिन भवन परिसर सल्लाघारीमा वृक्षारोपण तथा माल्यापर्ण कार्यक्रम आयोजना गरेको थियो ।
सो अवसरमा नेपाली कांग्रेस भक्तपुरका सभापति एवम् प्रतिनिधि सभा सदस्य दुर्लभ थापाले विपिले देखाएको बाटो बिर्सन नहुने बताए । राष्ट्रियता, प्रजातन्त्र र समाजवादबारे विपिका बिचारलाई मूलमन्त्र बनाएकै कारण ्कांग्रेसलाई जनताको मन पराएका उनले जिकिर गरेका छन ।
देशको सार्वभौम सत्ता रक्षाको लागि विपिले राष्ट्रिय मेलमिलापको नीति लिएको जस्तै वर्तमान अवस्थामा राजनैतिक स्थायित्वको लागि कांग्रेसले नेकपा एमालेसँग सत्ता सहकार्य गरेको उनको दावी छ । उनले पार्टीमा गुट र उपगुटको गोलचक्कर त्यागेर ईमान्दार नेताकार्यकर्ता बन्न निर्देशन समेत दिएका छन् । जनताको मन जित्न र ८४ को निर्वाचनमा कांग्रेसलाई पहिलो पार्टी बनाउन नेता कार्यकर्ताहरुलाई उनले निर्देशन दिए ।
कार्यक्रममा प्रदेश सांसद सुरेश श्रेष्ठ, नेपाली कांग्रेसका केन्द्रीय सदस्य मदनकृष्ण श्रेष्ठ, पूर्व जिल्ला सभापति गणेशमान चक्रधर, भक्तपुर क्षेत्र नं १ का सभापति एवम् चाँगुनारायण नगरपालिकाका प्रमुख जीवन खत्री, भक्तपुर क्षेत्र नं २ का सभापति भेषबहादुर कार्की, मध्यपुर थिमि नगरपालिकाका प्रमुख सुरेन्द्र श्रेष्ठ, बागमती प्रदेश समिति सदस्य सुमन कार्की, मध्यपुर थिमि नगरसभापति हरिदास प्रजापति, सूर्यविनायक नगर सभापति निशान ढुंगेल, चाँगुनारायण नगरसभापति शिवहरी केसी, भक्तपुर नगर सभापति राजेन्द्र तमखू, वडा सभापतिहरु लगायतको उपस्थिति रहेको सचिव सुशील बस्नेतले बताए ।