भक्तपुर, १० पुस २०८१क्रिश्चियन धर्मका संस्थापक येशु ख्रीष्टको जन्म दिनको सम्झनामा आज क्रिसमस डे मनाइदैछ । क्रिसमस पर्वको अवसरमा आज सार्वजनिक बिदा दिइएको छ ।
आजभन्दा २ हजार २५ वर्षअघि डिसेम्बर २५ तारिख अर्थात् आजकै दिन येशु ख्रीष्टको जन्म इजरायलको वेथलेहेममा भएको बिश्वास गरिन्छ ।
विश्वका धेरै मानिसले मनाउने क्रिसमस डे नेपालमा भने विसं २०६३ पछि महत्व पाएको देखिन्छ । २०६३ सालमा पहिलोपटक सरकारले सार्वजनिक बिदा घोषणा गरेपछि यसको महत्व सबैसामू उजागर भएको हो । क्रिसमसका अवसरमा विसं २०६३ देखि २०७४ सम्म सार्वजनिक बिदा दिइएको थियो । विसं २०७५ देखि २०७७ सम्म भने क्रिश्चियन धर्मावलम्बीलाई मात्र बिदा दिइयो । विसं २०७८ देखि भने पुनः सबैलाई सार्वजनिक बिदा दिन थालिएको छ ।
नेपाल ख्रिष्टियन महासङ्घका अध्यक्ष सिबी गहतराजले बताए अनुसार मानिसलाई प्रेम गर्नेले प्रेम दिवस, शान्ति स्थापना गर्न आएकाले शान्ति दिवस र मुक्ति दिन आएकाले मुक्ति दिवसका रुपमा आजको दिनलाई मनाउने गर्दछन् । नेपालमा ३५ लाख क्रिश्चियन धर्मावलम्बी रहेका उनको भनाइ छ । १५ हजारभन्दा बढी चर्च बनिसकेको पनि उनले जनाएका छन् ।
क्रिश्चियनका १३ सम्प्रदाय छन् र १३ वटै सम्प्रदायका चर्च नेपालमा रहेको धार्मिक अभियन्ता केशव लुइँटेल बताउँछन् ।
पछिल्लो समय क्रिसमसको ब्यापकता बढ्दै गएको देखिन्छ । शहरका ब्यापारिक स्थलमा ‘क्रिसमस ट्रि’ सजाएर यो पर्व नजिकिएको संकेत दिने गरिएको छ । पर्यटकीय क्षेत्रमा मात्र होइन, क्लव र विद्यालयहरुमा समेत क्रिसमसको रमझम देखिन थालेको छ । ‘क्रिसमस ट्रि’ सँगै सान्ट्रा क्लजको पोशाक लगाएका युवा युवतीहरु आजका आकर्षण हुन् ।
येशु ख्रीष्ट जन्मोत्सवका रुपमा क्रिसमस मनाउने गरिएको भएपनि अन्य धर्मावलम्बी पनि क्रिसमसको रमाइलोमा सरिक हुने गरेका छन् । सबै धर्म र पर्वमा रमाउने पहिचान बनाएको नेपाली धार्मिक सहिष्णुता क्रिसमसको अवसरमा थप उजागर भएको देख्न सकिन्छ ।