भक्तपुर, १४ माघ २०८१प्रधानमन्त्री केपी शर्मा ओलीले कसैले ढल्यो ढल्यो भन्दैमा सरकार नढल्ने जिकिर गरेका छन् । पछिल्ला सम्बोधनमा सरकार नढल्ने स्पष्टीकरण दिदै आएका प्रधानमन्त्री ओलीले सोमबार सूर्यविनायक नगरपालिकाको कटुन्जेस्थित नवनिर्मित प्रशासकीय भवन उद्घाटन गर्दै सोही जिकिर गरेका हुन् ।
प्रधानमन्त्री ओलीले सत्ताको खिचातानी बढेकाले दुई ठुला दल मिलेर सरकार बनाउनु परेको बताए । “देश साँच्चै अप्ठ्यारोमा परेको छ ।” उनले भने, “यो सरकारको कुनै विकल्प छैन ।” नेपाली कांग्रेस र नेकपा (एमाले)ले मिलेर मात्र देशलाई स्थिरता दिन सक्ने कुरामा ढुक्क हुन उनले आग्रह समेत गरे ।
आफूलाई सामान्य रुघाखोकी लाग्दा पनि आईसीयूमा रहेको तस्बिर सार्वजनिक भएको भन्दै उनले आफू प्रति असहिष्णुता बढेको खुलासा गरे । मानिसहरुले आफ्नाबारे भ्रम फैलाइरहेको उनको आरोप छ ।
सो अवसरमा प्रधानमन्त्री ओलीले सूर्यविनायक नगरपालिकाको नवनिर्मित प्रशासकीय भवनबाट जनताको सेवामा थप सुविधा पुग्ने विश्वास व्यक्त गरे । चुनाव जित्न जनताको मत चाहिने र त्यसका लागि जनताको मन जित्नुपर्नेमा उनले जोड दिए ।
“सोझा जनतालाई आतङ्कको छायाँमा राखेर चुनाव जित्ने जमाना सकियो ।” उनले भने । जनताको मतका लागि एकतावद्ध भएर जनसेवामा जुट्नुपर्ने उनको निर्देशन छ । राजतन्त्रको समयमा देशको विकास हुन नसकेको र अहिले विकास निर्माणले गति लिएको दावी गर्दै प्रधानमन्त्री ओलीले ब्यवस्था बलियो बनाउन स्थानीय सरकारले राम्रो काम गर्नुपर्नेमा जोड दिए ।
सूर्यविनायक नगरपालिका प्रमुख वासुदेव थापाको अध्यक्षतामा सम्पन्न कार्यक्रममा कार्यक्रममा प्रतिनिधि सभा सदस्य दुर्लभ थापा, बागमती प्रदेश सरकारका स्वास्थ्य मन्त्री किरण थापा, पूर्वमन्त्री महेश बस्नेत लगायतको आतिथ्यता रहेको थियो ।