भगवान शिवको सवैभन्दा प्रिय महिना नै साउन भएकोले हिन्दुहरुका लागि साउन महिनाले विशेष अर्थ बोकेको छ । यो भगवान शिवको आरधना र उपासना गर्दै ब्रत बस्ने महिना हो । साउन महिनामा भगवान शिव स्वयम यस धर्तिमा आउने जनविस्वास रहेको छ । यसर्थ, उनलाई खुशी बनाउन यो महिना उत्तम मानिन्छ ।
भगवान शिव छिट्टै प्रसन्न हुने देवता पनि हुन् । धर्म शास्त्रका अनुसार भगवान शिवको पूजा सच्चा मन र विधि-विधानले गरियो भने उनी तुरुन्तै प्रसन्न हुन्छन र भक्तजनको मनोकामना पूरा गरिदिन्छन ।
भगवान शिवलाई हरियो रंग मनपर्ने र उनी यसबाट प्रसन्न हुने धार्मिक विश्वास रही आएको छ । साउन महिनामा चारैतिर हरियाली नै हरियाली हुने हुनाले भगवान शिवलाई आकर्षित गर्न भक्तजनले हरिया पहिरन लगाउने बताइन्छ । हिन्दू धर्मग्रन्थका अनुसार साउनमा देवी पार्वतीले पनि शिवलाई खुशी पार्न हरिया चुरा, पोते र हातमा मेहेन्दी लगाएकी थिइन् । जसबाट प्रसन्न भएर भगवान शिवले उनलाई सौभाग्य प्राप्तिको खुसी दिएका थिए । त्यसैले आफ्नो सौभाग्य बनाइराख्ने आशिर्वाद प्राप्त गर्न विशेषगरी हिन्दु नारीहरु साउन भरी हरियो पहिरनमा सिङ्गारिएका देखिन्छन ।
हरियो रंग सौभाग्य संग जोडिएको मानिन्छ । यसले भाग्यखुल्ने विस्वास गरिन्छ । यसका साथै साउनमा हरियो लगाएर मानिसहरु प्रकृति प्रति अनुग्रहित भएको आभाष मिल्दछ । पण्डितहरु प्रकृतिप्रेमीहरुप्रति भगवान शिव प्रसन्न हुने भएकोले साउनमा हरियो रंगको विशेष अर्थ हुने जिकिर गर्छन ।
यसका साथै उनीहरु साउनमा कालो रंगको प्रयोग नगर्न पनि सुझाव दिन्छन । भगवान शिवलाई कालो रंग बिल्कुल राम्रो नलाग्ने बताइन्छ । यो रंग देख्ने वित्तिकै उनी क्रोधित हुने पण्डितहरु बताउछन ।
यदि तपाइँ शिवको कृपा चाहनु हुन्छ भने विशेषगरी पूजा गर्ने समयमा कालो कपडा नलगाउन समेत पण्डितहरु सुझाव दिन्छन ।