उपत्यकाका नेवाःले मङ्सिर २६ अर्थात भोलि यःमरी पुन्ही मनाउँदै छ । नेवाः परम्परा अनुसार हरेक वर्ष यःमरी पुन्ही धान्य पुर्णिमाको अवसर पारेर मनाईने गर्दछ ।

नेपालभाषामा ‘य’ भनेको मनपर्ने र ‘मरी’ भनेको रोटी हो । यःमरीको अर्थ मनपर्ने रोटी हो । मङ्सिरमा किसानले धान भित्र्याएपछि सोही धानको पिठोबाट बनेको विषेश प्रकारको रोटी हो–यःमरी ।

नयाँ अन्नबाट बनेको रोटीलाई देवी देवता तथा पितृलाई चढाएर प्रसादको रुपमा ग्रहण गर्ने चलन रहेको छ । सोही चलनलाई यःमरी पुन्ही भनिन्छ । यःमरी बनाउन चामलको पिठो, चाकु र तिलको मिश्रण प्रयोग गरिन्छ ।

यःमरीको एकतिर चुच्चो परेको हुन्छ । यःमरीको चुच्चो जति लामो भयो दिन त्यति नै लम्बिदै जाने जनविश्वास रहेको छ ।