डिएआर मुभिजको आयोजनामा आगामी फागुन १६ गतेदेखि २० गतेसम्म टुँडिखेलमा प्रथम राष्ट्रिय काँठे लोक दोहोरी महोत्सव हुने भएको छ। महोत्सवका संयोजक नमराज ढुंगानाले सोमबार आयोजित एक कार्यक्रममा पर्यटन वर्ष २०२० लाई सफल पार्न सो महोत्सव आयोजना गरेको बताए ।

प्रथम राष्ट्रिय काँठे लोक दोहोरी महोत्सवले काँठ क्षेत्रका गीत संगीतलाई संरक्षण तथा प्रवर्द्धन पनि हुने उनको विश्वास रहेको छ। कार्यक्रम संयोजक ढुंगानाले भने,‘ ‘काँठ क्षेत्रको कला र संस्कृति हरेक नेपालीको सान, हाम्रै संस्कृतिको संरक्षण गर्ने हाम्रो अभियान’ भन्ने मूल नारा लिएर महोत्वस गर्न लागेका छौँ। यसले पर्यटन वर्षलाई सहयोग मिल्नेछ।’

काठमाडौं आसपासका काँठभित्र लुकेका परिचयात्मक, ऐतिहासिक, साँस्कृतिक धरोहरलाई समावेश गर्ने उनले बताए। कार्यक्रम परिकल्पनाकार तथा लोक दोहोरी गायक माधव थापाले काँठे लोक गीत, संगीत, जसमा मेलापात जाँदा घाँसे गीत, सेलो, खैजेडि भजन, झाँक्रि, मारुनी, चुट्का, ठट्यौली लगायत सांगीतिक र सांस्कृतिक परिचय बोकेको काँठ क्षेत्र थप व्यापकता प्रदान गर्न यो महोत्सवले महत्वपूर्ण भूमिका खेल्ने सुनाए।
उनका अनुसार पर्यटन भ्रमण वर्ष २०२० को पर्वद्धन गर्ने, काँठ क्षेत्रमा रहेको एतिहाँसिक, पुरातात्विक, सांस्कृतिक, खाना, बाध्यवादन, भेषभूषा, रहनसहन, हस्तकला लगाएतको प्रवद्धन गर्ने, पुराना तथा नयाँ श्रष्टा एकै स्थानमा राखी सम्मान तथा पुस्ता हस्तान्तरण प्रोत्साहन गर्ने तथा ती कुरालाई विश्व सामु उजागर गराउने उद्देश्य रहेको छ।

के कस्ता कार्यक्रम हुने छन्?

कार्यक्रम आयोजकका अनुसार टुँडिखेलमा हुने कार्यक्रममा सर्वसाधारणलाई निःशुल्क प्रवेशको व्यवस्था गरिएको छ। फागुन १६ गतेदेखि २० गते अर्थात (पाँच दिन) सम्म चल्ने महोत्सवको हरेक दिन बिहान १० बजे देखि साँझ ५ बजे सम्म कार्यक्रम हुने छ। त्यस कार्यक्रममा नयाँ तथा पूराना कलाकारहरुको प्रस्तुति रहने छ भने, व्यपार प्रवद्र्धनका लागि एक सयभन्दा बढी स्टलको व्यवस्था गरिने छ। महोत्सव भित्र खुला काँठे लोक दोहोरी प्रतियोगीता पनि गरिने छ। देश भित्र तथा बाहिर जुनसुकै ठाउँमा रहेकाले पनि यो प्रतियोगितामा भाग लिन पाउने छन्। प्रतियोगितामा प्रथम, दोस्रो, तेस्रो तथा सान्त्वना हुनेले क्रमश : नगद तीन लाख, दुई लाख, एक लाख र ५० हजार सहित मेडल, प्रमाण पत्र लगायत अन्य पुरस्कार प्राप्त गर्नेछन्।