भक्तपुर १ स्थित गणेश मन्दिरमा क्षमा पूजा सम्पन्न भएको छ । च्वंगा गणेश मन्दिर जाने बाटोमा पाटी संगै बनेको नवनिर्मित मन्दिरमा शुक्रवार क्षमा पूजा सम्पन्न भएको हो ।
स्थानीय मुपुज्व: टोल सुधार समितिले निर्माण गरेको मन्दिरमा त्यहिँ रहेको गणेशको मूर्ती स्थापित गरिएको हो । क्षमा पूजामा समे बजी लगायत अर्पण गर्दै पूजा गरिएको थियो भने उपस्थित भक्तजनले प्रसाद ग्रहण गरेका थिए । उक्त अवसरमा स्थानीयको उल्लेखनीय उपस्थिति रहेको थियो ।
मन्दिर निर्माणमा नगद र जिन्सी गरी सैतीस लाख खर्च भएको र आठ लाख ऋण रहेको टोल सुधार समितिका अध्यक्ष शारदा भक्त बैद्य(साइला)ले जानकारी गराए । उनका अनुसार स्थानीयकै पहल र सहयोगमा निर्माण सम्पन्न भएको हो । ” नगरपालिकाले पनि आस्वाशन दिएको छ । हामी सहयोगको लागि निवेदन दिदैछौ ।” उनले भने ।
च्वंगा गणेशको फेदिमै मूल सडकको पाटीसंगै प्राचिन शैलीमा बनेको नवनिर्मित मन्दिर आकर्षक देखिएको छ । यसले धार्मिक आस्था मात्र नभई यस क्षेत्रको शोभा समेत बढाएको स्थानीय कृष्ण चौगुठी बताउछन ।