निर्वाचन आयोगले प्रदेशसभा र प्रतिनिधिसभाको निर्वाचनका लागि आन्तरिक तयारी थालेको छ । आयोगले आउँदो कात्तिक अन्तिम साता निर्वाचन गर्ने गरी तयारी थालेको हो ।

आयोग स्रोतका अनुसार सरकारसँग निर्वाचनका लागि अनौपचारिक छलफल भएको छ । कात्तिक अन्तिम साता निर्वाचन गर्ने गरी छलफल भएको एक आयुक्तले जानकारी दिए ।केही दिनमा नै औपचारिक रूपमा मिति प्रस्ताव गर्ने तयारी भइरहेको उनले बताए ।

आयोग एकै चरणमा निर्वाचन गर्न सकिने निष्कर्षमा पुगेको छ । सोहीअनुसार सरकारलाई प्रस्ताव गरिने उनले जानकारी दिए । एकै चरणमा निर्वाचन गर्दा सुरक्षा चुनौती हुन सक्ने कुरा पनि उठेको छ । उनी भने सुरक्षा चुनौती नहुने दाबी गर्छन् ।

आयोगका प्रवक्ता शालिग्राम शर्मा पौडेलले भने आयोग निर्वाचनका लागि तम्तयार भएको बताएका छन् । सरकारसँग औपचारिक छलफलपछि मात्र मिति टुंगो लाग्ने उनको भनाइ छ ।