नेकपा माओवादी केन्द्रले ३० वैशाखमा भएको स्थानीय तह निर्वाचनमा भएको अन्तर्घातको छानबिन गर्ने भएको छ ।

काठमाडौंमा जारी केन्द्रीय समितिको बिहीबारको बैठकमा अध्यक्ष पुष्पकमल दाहाल प्रचण्डले अनुशासन आयोगका अध्यक्ष टंक राईको नेतृत्वमा छानबिन समिति बनाउने प्रस्ताव राखेका हुन् ।स्थानीय चुनावमा १५० देखि १७० वटा पालिका जित्ने अनुमान माओवादीले गरेको तर अनुमानभन्दा ५० सिट कम जितेको र त्यसमा पनि खासगरी मधेसमा पार्टीको निराशाजनक नतिजा आएको प्रचण्डको भनाई थियो ।

कतिपय स्थानमा आफ्नै पार्टीका उम्मेदवारलाई हराउनुलाई नै सफलता मान्ने प्रवृत्ति देखिएको प्रचण्डले बताए । धेरै सिनियर नेताहरुलाई पनि अन्तरघातको आरोप लागेको उनको भनाइ छ । यो समितिले १५ दिनभित्र स्थायी समितिलाई प्रतिवेदन बुझाउने र त्यसका आधारमा कारबाही गर्ने उनले बताए ।