मध्यपुर थिमि, २८ साउन २०७९ उपराष्ट्रपति नन्दबहादुर पुन मध्यपुर थिमिमा आउने भएका छन् । आज शनिवार राति ९ बजे उनी मथिनपा ४ स्थित बालकुमारी मन्दिरमा आउने भएका हुन् ।
मध्यपुर थिमि नगरपालिकाको औपचारिक निमन्त्रणामा उपराष्ट्रपति पुन बालकुमारी आउन लागेका नगर उपप्रप्रमुख विजय कृष्ण श्रेष्ठले बताए । उक्त अवसरमा उपराष्ट्रपति पुनले ऐतिहासिक लाय्कु भैल: प्याखँ अर्थात लायकू भैरव नाच अवलोकन तथा प्रसाद ग्रहण गर्ने कार्यक्रम रहेको उनले जानकारी गराए ।
मध्यपुर थिमिमा शनिवार रातिदेखि देवी देवता जागा हुन्छन । गाईजात्राको भोलिपल्टदेखि ४ रात अर्थात भाद्र कृष्ण द्वितीया (गुँलागा द्वितीया) देखि पञ्चमीसम्म देवी देवता नचाइने परम्परा अनुसार देवीदेवताको नाच शुरु हुन्छ ।
लायकू दरबारबाट निस्किएर लाय्कु भैल: प्याखँ अर्थात लायकू भैरव नाच बालकुमारी मन्दिर प्राङ्गण लगायत विभिन्न टोलमा ४ दिनसम्म प्रत्येक साँझदेखि राती अबेरसम्म सञ्चालन हुने गर्दछ ।
भैलः प्याखँमा पाँच जना देवीदेवताले नाच प्रस्तुत गर्ने भए पनि वाद्यवादन, सहयोगी र व्यवस्थापक गरी करिव तीन सय जनाको समूह खटिएका हुन्छन । मध्यपुर थिमिको ऐतिहासिक लाय्कु भैल: प्याखँको बिकास, प्रचारप्रसार र पर्यटन प्रवर्द्धनमा उपराष्ट्रपति पुनको आगमन महत्वपूर्ण हुने नगरपालिकाले विश्वास लिएको छ ।
