भक्तपुर,६ भदौ २०७९नेकपा माओवादी केन्द्र र नेकपा एकीकृत समाजवादीले आगामी प्रतिनिधि सभा र प्रदेश सभा निर्वाचनमा एउटै घोषणा पत्र बनाउने भएका छन्।
नेकपा माओवादीका अध्यक्ष पुष्पकमल दाहाल प्रचण्ड र नेकपा एकीकृत समाजवादीका अध्यक्ष माधव नेपालबीच सोमबार भएको छलफलपछि आगामी चुनावमा एउटै घोषणा पत्र बनाउन तयार भएका हुन्। दुई पार्टीले निर्वाचन अघि एकता संयोजन समितिसमेत घोषणा गर्ने भएका छन्।
चुनावमा एउटै घोषणा पत्र र एकता संयोजन समिति घोषणा गर्न आफूहरु सहमत भएको नेकपा माओवादी केन्द्रका वरिष्ठ अध्यक्ष नारायणकाजी श्रेष्ठले जानकारी दिए।
भेटमा प्रचण्ड र माधव नेपासँगै वरिष्ठ उपाध्यक्ष श्रेष्ठ र नेकपा एकीकृत समाजवादीका महासचिव बेदुराम भुसाल सहभागी थिए। चुनावअघि पार्टी एकता गर्न समय नपुग्ने भए पनि एकताको सन्देश दिनलाई दुई पार्टीले एकता संयोजन समिति घोषणा गर्न लागेका हुन्।
२०७४ सालको निर्वाचनअघि तत्कालिन नेकपा एमाले र माओवादी केन्द्रले एउटै चुनावी घोषणा पत्र तयार पारेका थिए भने निर्वाचनपछि पार्टी एकता गरेका थिए।