भक्तपुर,२९ भदौ २०७९प्रमुख प्रतिपक्षी दल नेकपा एमालेले निर्वाचन आचारसंहिता राजपत्रमा प्रकाशित भइसकेकाले संशोधन गर्न नहुने धारणा राखेको छ ।
निर्वाचन आयोगको बुधबारको छलफलमा सत्तारूढ दलले प्रधानमन्त्री र मन्त्रीहरू आफू उमेदवार भएको क्षेत्रबाहेक अन्यत्र चुनाव प्रचारप्रचारमा जान नपाउने आचारसंहितामा संशोधन गर्न माग राखेका थिए । एमालेले भने सो विषय सही भएपनि संशोधन गर्न नहुने धारणा राखेको हो ।
एमाले निर्वाचन विभागका सचिव केदार कोइरालाले स्थानीय निर्वाचनको आचारसंहितामा सत्ता पक्षले सुटुक्क हस्ताक्षर गरेको आरोप लगाएका छन् ।
निर्वाचन प्रचारमा जान रोक्नु मान्यताविपरीत भएपनि निर्वाचनको निष्पक्षतामा प्रभाव पार्ने भएकाले अब आचारसंहिता संशोधन गर्न नहुने उनको भनाइ छ ।
भदौ २७ गते संसद्को राष्ट्रिय सरोकार तथा समन्वय समितिको बैठकमा एमाले संसदीय दलका उपनेता सुवास नेम्वाङले प्रधानमन्त्री र मन्त्रीले चुनाव प्रचारमा जान नपाउने विषय संसदीय प्रणालीको मूल्य र मान्यताको विपरीत भन्दै आपत्ति जनाएका थिए ।