![](https://bhaktapurpost.com/wp-content/themes/onlineparda/images/1px.gif)
सञ्चार तथा सूचना प्रविधि मन्त्री रेखा शर्माले अब चलचित्रको संख्यामा भन्दा गुणस्तरीयतामा ध्यान दिनुपर्ने बताएकी छन् । नेपाल चलचित्र निर्माता संघले आयोजना गरेको कार्यक्रममा बुधवार उनले चलचित्रको गुणस्तरीयतामा ध्यान दिनुपर्ने बताएकी हुन् ।
‘हिजो चलचित्रको संख्या कम रहेको र प्रविधिको प्रयोग नहुने बेलामा चलचित्रको संख्या बढाउनु महत्वपूर्ण नै हुन्थ्यो’– उनले भनिन्– ‘तर, अब छायांकनदेखि प्रदर्शनसम्ममा प्रविधिको उच्चतम प्रयोग भइरहेको र अन्तर्राष्ट्रिय चलचित्र उद्योगसँग समेत प्रतिष्पर्धा गर्ने समय आएकाले गुणस्तरमा ध्यानदिनुु आवश्यक छ ।’
चलचित्र क्षेत्रको बिकासका लागि आवश्यक कानुन र नीतिनिर्माणको सवालमा सरकारले सहयोग गर्ने प्रतिबद्धता व्यक्त व्यक्त गर्दै उनले चलचित्र बिकास बोर्डमार्फत चलचित्र क्षेत्रका समस्या र नीतिगत समाधानका उपायहरु केन्द्रिकृत गर्न आग्रह गरेकी थिइन् ।
अहिले पनि नेपाली चलचित्र क्षेत्र २०२६ सालको ऐनद्वारा निर्देशितभएको उल्लेख गर्दै मन्त्री शर्माले हिजो श्वेत चलचित्रचलाउने कानुनले आजको डिजिटल युुगलाई प्रतिनिधित्व गर्न नसक्ने बताउदै चलचित्र ऐन परिमार्जन थालिएको जानकारी गराइन । अहिले चलचित्र बोर्डले मस्यौदा तयार गरिरहेको उल्लेख गर्दै उनले जतिसक्यो चाँडो मन्त्रालयबाट टुंग्याएर अघि बढाउने प्रतिबद्धता पनि प्रकट गरिन ।
चलचित्र आम सञ्चार क्षेत्रको सशक्त माध्यम भएकाले यसलाई राजनीतिक सामाजिक परिवर्तनका सन्देश प्रवाह गर्ने माध्यमको रुपमा पनि परिचालन गर्नु आवश्यक रहेको उनको भनाइ छ । ‘चलचित्र मनोरञ्जनको साधन मात्र होइन, यो सन्देश प्रभावको माध्यम पनि हो’– मन्त्री शर्माले भनिन् – ‘त्यसैले चलचित्र निर्माण गर्दा विषयवस्तुु, सन्देश र कलापक्षको सन्तुलनमा बराबरी ध्यान दिनुु आवश्यक छ ।’
नेपाल प्राकृतिक हिसाबले सुन्दर र सांस्कृतिक हिसाबले विविधतायुक्त मुलुुक भएकाले यसलाई राम्रोसँग चलचित्रमा प्रस्तुत गरेर राष्ट्रिय÷अन्तर्राष्ट्रियस्तरमा प्रचार गर्न सके चलचित्रको माध्यमबाट देशको पर्यटनको बिकास र समृद्धिमा ठूलो योगदान गर्न सकिने विश्वास व्यक्त गर्दै मन्त्री शर्माले चलचित्रको क्षेत्रमा सहयोग गर्न आफ्नो मन्त्रालय सदैव तत्पर रहेको बताइन ।
चलचित्र निर्माता संघका अध्यक्ष नवल खड्काको अध्यक्षतामा सम्पन्न कार्यक्रममा नेपाली चलचित्र उद्योगका विभिन्न संघ संस्थाका निर्वाचित तथा नियुक्त पदाधिकारी र सदस्यलाई सम्मानगरिएको थियो भने संघले मन्त्री शर्मालाई समेत सम्मान गरेको थियो ।