भक्तपुर, ६ भदौ २०८१गाईजात्रामा दुई लठ्ठी जुधाएर गरिने खेल/नृत्य घिन्ताङ्ग घिसी ट्वाक्कप्रति प्रमुख प्रतिपक्षी दल नेकपा (माओवादी केन्द्र)को पनि आकर्षण बढेको छ । यसै आकर्षणका कारण माओवादी केन्द्रको सहायक संगठन योङ्ग कम्युनिष्ट लिग नेपाल (वाइसिएल, नेपाल) को भक्तपुर नगर समितिले शुक्रवार घिन्ताङ्ग घिसी प्रदर्शन गर्ने भएको छ ।
सोमबार साँझबाट शुरु भई ८ रात ९ दिन सम्म मनाइने भक्तपुरको गाईजात्राको आकर्षण घिन्ताङ्ग घिसी ट्वाक्क पनि हो ।
शुक्रवार दिउँसो १ बजे भनपा-९ स्थित नवदुर्गास्थानबाट घिन्ताङ्ग घिसी शुरु हुने वाईसीएलका भक्तपुर नगर अध्यक्ष बिकास लाखेले बताए । नवदुर्गास्थानमा सम्यबजी लिएर शुरु गरिने घिन्ताङ्ग घिसीले नगर परिक्रमा गर्ने कार्यक्रम तय भएको वाइसिएल नगर इन्चार्ज राज वाङ्गयोले जानकारी दिए । सो अवसरमा करिब ५ सय वाइसिएल सहभागी रहने र त्यसबाहेक पार्टीका अन्य नेताकार्यकर्ताको पनि सहभागीता रहने उनले बताएका छन् ।
गाइजात्रा भक्तपुरको सांस्कृतिक सम्पत्ति भएको तथा त्यसको बिकास र प्रचारको लागि वाइसिएलको कार्यक्रमलाई पार्टीले सहयोग गरिरहेको नेकपा (माओवादी केन्द्र)का नगर अध्यक्ष राकेश सुवालले बताए । सम्यबजी व्यवस्थापनको जिम्मा पार्टीले लिएको र अन्य सबै व्यवस्थापन वाइसिएलकै भएको उनको भनाइ छ । नगर कोषाध्यक्ष कृष्णमान बनमालालाई सम्यबजी व्यवस्थापनको जिम्मा दिइएको उनले जनाएका छन् ।
घिन्ताङ्ग घिसीको लागि आवश्यक सम्पूर्ण तयारी सकिएको वाइसिएल नेता रोशन बासुकलाले बताए । यसको प्रचार संयोजकको जिम्मेवारी भने नगर उपाध्यक्ष अजय बासुकलाले पाएका उनले बताए ।
वाइसिएलको घिन्ताङ्ग घिसी कार्यक्रम सभ्य र भब्य हुने वाइसिएल जिल्ला अध्यक्ष सरराज उप्रेतीले जनाएका छन् । त्यसैगरी यो कार्यक्रमले संगठनलाई चुस्त बनाउनुका साथै संस्कृतीप्रेम पनि बढाउने वाइसिएल जिल्ला इन्चार्ज नरेश रन्जितले बिश्वास व्यक्त गरेका छन् ।
युवाहरुको उत्साहबाट अन्य जनवर्गीय संगठनले पनि सिक्नुपर्ने र एक अर्काको कार्यक्रमलाई उत्साह प्रदान गर्नुपर्ने माओवादी केन्द्रका जिल्ला अध्यक्ष सुनिल गोठे बासुले बताएका छन् । गत वर्ष पार्टीले आयोजना गरेको यो कार्यक्रममा यस वर्ष वाइसिएलले काँध थापेको भन्दै उनले सन्तोष व्यक्त गरेका छन् ।