भक्तपुर, ८ भदौ २०८१भक्तपुर गाईजात्रामय छ । भक्तपुरमा दर्जनौं समूह घिन्ताङ्ग घिसी ट्वाक्कको तालमा नाच्दै गाइजात्रा जारी रहेको संदेश दिईरहेका छन् । सोमबार साँझदेखि शुरु यो पर्व ८ रात ९ दिन लामो समयसम्म चल्ने गर्दछ । घिन्ताङ्ग घिसी ट्वाक्कले यो अवधीभर भक्तपुरको आकाश गुञ्जयमान हुने गर्दछ भने धरती मुस्कुराईरहन्छ ।
दुई लठ्ठी जुधाएर गरिने परम्परागत खेल/नृत्य घिन्ताङ्ग घिसी ट्वाक्क मनमोहक र आनन्ददायक छ । यस प्रति विशेषगरी युवाहरुको रुझान बढी देखिन्छ । राजनीतिक दल नेकपा(माओवादी केन्द्र) का युवाहरुको संगठन वाइसिएल नेपालले पनि आफ्ना युवाहरुलाई घिन्ताङ्ग घिसीमा जोडेर पर्वको खुशी साटेको छ । शुक्रवार वाइसिएलको भक्तपुर नगर समितिले आयोजना गरेको घिन्ताङ्ग घिसी नाचमा युवाहरु उत्साह र उमंगसहित दिन खोलेर नाचेका छन् ।
आफ्ना नेताहरु पनि साथ् दिन आएपछि उनीहरु अझै हौसिएका देखिन्थे । नेकपा(माओवादी केन्द्र)का जिल्ला इन्चार्ज दिलिप प्रजापति, बागमती प्रदेश सभा सदस्य एवं पार्टीका केन्द्रीय सदस्य देवेन्द्र श्रेष्ठ त्यसैगरी अर्का केन्द्रीय सदस्य डिपी ढकाल उनीहरुलाई साथ् दिन नगरमा ओर्लिए ।
वाइसिएलको घिन्ताङ्ग घिसी कार्यक्रममा प्रमुख आकर्षणका केन्द्र भने सिन्धुपाञ्चोक १ बाट संघीय सांसद निर्वाचित माओवादी केन्द्रका प्रखरवक्ताको पहिचान बनाएका नेता माधव सापकोटा सुवोध रहेका थिए । उनले नेवा:संस्कृतीमा रमाइरहेका वाइसिएल र पार्टीका नेताकार्यकर्ताको तालमा ताल मिलाउदै साथ् दिए ।
संविधान सभा सदस्य उमा कपाली र सत्यलाल मूल, प्रदेश सभा सदस्य भुवनकेशरी श्रेष्ठ भावना त्यसैगरी नेताहरु सुरेश न्यौपाने, युवराज आचार्य, रामलाल न्हेम्हाफुकी लगायत दर्जनौ नेताहरुको पनि कार्यक्रममा सहभागीता रहेको थियो ।
शुक्रवार दिउँसो ३ बजे भनपा-९ स्थित नवदुर्गास्थानबाट शुरु घिन्ताङ्ग घिसीले ३ घण्टा लगाएर नगर परिक्रमा गरेको थियो । सो अवसरमा करिब ५ सय वाइसिएल र त्यसबाहेक पार्टीका अन्य नेताकार्यकर्ताको पनि उल्लेखनीय सहभागीता रहेको वाइसिएल नेता रोशन बासुकलाले बताएका छन् ।
सहभागीहरु घिन्ताङ्ग घिसीमा मात्र सिमित रहेनन । उनीहरुले समसामयिक राजनीतिक, सामाजिक र आर्थिक लगायत विषयमा व्यंग्य पनि गरे । बिभिन्न कार्टुन र प्ले कार्ड मार्फत उनीहरुले वर्तमान केपी ओली सरकार भ्रष्टाचारको ढाकछोप गर्न बनेको बताए । यसको संयोजन वाइसिएल नगर उपाध्यक्ष अजय बासुकलाले गरेका थिए ।
सयौंको मासलाई व्यवस्थित र सभ्य किसिमले संचालन गर्नु चानचुने कुरा होइन । अन्य समूह र बाटोका पैदल यात्रु र सवारी साधनलाई व्यवधान नहुने गरी मास मुभ भएको थियो । यसको जिम्मेवारी पाएका वाइसिएल नगर इन्चार्ज राज वाङ्गयो र नगर अध्यक्ष बिकास लाखे लगायतले सफलतापूर्वक मास मुभ गराएका जिल्ला अध्यक्ष सरराज उप्रेतीले जनाएका छन् ।
गाइजात्रा भक्तपुरको सांस्कृतिक सम्पत्ति भएको तथा त्यसको बिकास र प्रचारको लागि वाइसिएलको कार्यक्रमले सहयोग पुर्याएको नेकपा (माओवादी केन्द्र)का नगर अध्यक्ष राकेश सुवाल बताबताउँछन् ।
गत वर्ष पार्टीले गरेको यो कार्यक्रममा यस वर्ष वाइसिएलले काँध थापेको भन्दै माओवादी केन्द्रका जिल्ला अध्यक्ष सुनिल बासुले सन्तोष व्यक्त गरेका छन् ।
