अस्थायी राजधानी हेटौडा रहेको प्रदेश ३ को स्थायी राजधानी काभ्रेमा तोक्न प्रस्ताव दर्ता भएको छ । प्रदेशसभा सचिवालय हेटौँडामा उक्त प्रस्ताव दर्ता गरिएको हो ।

काभ्रेबाट प्रदेशसभा सदस्य निर्वाचित भएका नेकपा एमालेका चन्द्रबहादुर लामाले प्रदेश ३ को स्थायी राजधानी काभ्रे जिल्लाको धुलिखेलस्थित आईटी पार्कमा तोक्न प्रस्ताव गरेका हुन् । उनको समर्थकहरूमा काभ्रेकै प्रदेशसभा सदस्य एमालेका लक्ष्मण लम्साल र बसुन्धरा हुमागाईं तथा नेकपा (माओवादी केन्द्र)का रत्न ढकाल रहेका छन् ।
नेपालको संविधानमा प्रदेशको राजधानी प्रदेशसभामा तत्काल कायम रहेको सदस्य सङ्ख्याको दुई तिहाइ बहुमतबाट निर्णय भएबमोजिम हुने व्यवस्था रहेको छ ।
श्रोतका अनुसार प्रदेश सभाको स्थायी मुकाम तोक्नेबारे सत्तारुढ दल नेकपा एमालेमै पनि एकमत भने रहेको छैन । प्रभावशाली प्रदेश सभा सदस्य राजेन्द्र पाण्डेले धादिङ्गलाइ मुकाम बनाउनुपर्ने माग गरेका छन् भने हेटौडा हुनु अघि नै भक्तपुर एमाले वृत्तको रोजाइमा भएको चर्चा थियो ।