News Portal

  • बाम गठबन्धनको बैशाख १ मै एकताको आशंका

    ४१३ पटक

     

    एमाले र माओवादी केन्द्रबीच तोकिएको मितिमै पार्टी एकता घोषणा हुनेमा संशय देखिएको छ । कम्युनिस्ट पार्टी स्थापना दिवस पारेर आगामी वैशाख ९ गते एकता घोषणा गर्ने अनौपचारिक कुराकानी भए पनि आन्तरिक तयारी सुस्त छ । यो खबर हामीले आजको कान्तिपुरबाट लिएका हौ।

    पार्टी एकतासम्बन्धी विधान र राजनीतिक प्रतिवेदन तयार पार्न गठित कार्यदलले वैशाख ९ मा पार्टी एकता गर्न सुझाएको थियो । त्यही दिन घोषणा गर्ने गरी दुवै दलले आ–आफ्नो पार्टीमा आन्तरिक तयारी अघि बढाउने भनिएको थियो । तर, वाम एकता संयोजन समिति बैठकले एकताको औपचारिक मिति तय गर्दै दुई दलबीच विवादित विषय निरूपण नगर्दा दुवै दलमा संशय छाएको छ । प्रधानमन्त्री एवं एमाले अध्यक्ष केपी ओली भारत भ्रमणमा जानुअघि गत २२ गते समितिको बैठक बसेको थियो ।

    उक्त बैठकले भारत भ्रमणलगत्तै विवादित विषय टुंगो लगाउने समझदारी गरेको थियो । तर, प्रधानमन्त्री भारत भ्रमणबाट फर्केपछि बैठक नै बस्न सकेको छैन । कहिले बैठक बस्ने भन्ने तय नभएको समितिका सदस्यसमेत रहेका एमाले वरिष्ठ नेता झलनाथ खनालले जानकारी दिए । ‘एकता संयोजन समितिको बैठक बसेर टुंगो लगाउने भनिएको हो, नेताहरूको व्यस्तताका कारण बैठक बस्न सकेको छैन,’ उनले भने ।

    एमाले र माओवादीबीच एकताका लागि आन्तरिक तयारी गर्न एउटा व्यवस्थापन समिति बनाउने भनिएको थियो । जनपरिचालनलगायत कामका लागि सहजीकरण गर्न त्यस्तो समिति आवश्यक ठानिएको थियो । तर, त्यो समिति नै बनेको छैन । त्यसैले जनवर्गीय संगठन परिचालन गर्ने भनिए पनि उनीहरूले एकतासम्बन्धी काम अघि बढाएका छैनन् ।

    एमाले र माओवादीबीच तीनवटा विषयमा अझै विवाद छ । जनयुद्ध, चुनाव चिहन र एकीकृत पार्टीको केन्द्रीय समितिमा कुन पार्टीका कति जना रहने भन्ने विषय टुंगो लगाउन बाँकी छ । माओवादीले बराबरी हैसियतमा एकता गर्नुपर्ने धारणा राखेपछि दुई दलबीचको दूरी केही बढेको छ । त्यस्तै प्रधानमन्त्री ओलीले सरकारमा एकलौटी ढंगले निर्णय गर्न थालेको गुनासो पनि माओवादी पक्षले गरेको छ ।

    पछिल्लो ३० सचिव सरुवा प्रकरणलाई लिएर माओवादी मन्त्रीहरू रुष्ट छन् । एकीकृत पार्टी नभएकै अवस्थामा प्रधानमन्त्रीको यो शैलीले एउटै पार्टी भएपछि झन् बढी दबदबा कायम गर्न सक्ने शंका माओवादीले गरेको छ । यो विषयमा कुरा गर्न मन्त्रीहरूले माओवादी अध्यक्ष पुष्पकमल दाहाललाई आग्रह पनि गरिसकेका छन् । ‘एउटै पार्टी मात्र हुँदा त छलफल हुन्छ तर अहिले फरक–फरक पार्टी अस्तित्वमा रहँदा पनि सामान्य छलफल गरिएन, छलफल गरेरै उहाँलाई लागेको निर्णय गरेको भए केही बिग्रिने थिएन,’ माओवादीका एक मन्त्रीले भने, ‘त्यसैले आगामी दिनमा पार्टीभित्रको कार्यशैली पनि यही ढंगको हुने हो कि भन्ने लागेर एकपटक कुरा गर्न अध्यक्षलाई आग्रह गरेका छौं ।’

    यो प्रकरणपछि प्रधानमन्त्री ओली र दाहालबीच प्रहरी महानिरीक्षक नियुक्ति सन्दर्भमा औपचारिक कुराकानी भयो । तर, पार्टी एकता र सरकारको कार्यशैलीका विषयमा कुराकानी हुन सकेको छैन । बुधबार एकता संयोजन समितिको बैठक बोलाइएको थियो । तर, माओवादी अध्यक्ष दाहाल बिरामी भएको भन्दै स्थगित गरियो । दाहालको अस्वस्थता शारीरिक हो कि राजनीतिक भन्नेबारे अहिले दुई दल वृत्तमा चर्चा भइरहेको छ । दाहाल बिहीबार चितवन पुगेका छन् । शुक्रबार पनि उनी त्यहीँ रहनेछन् । प्रधानमन्त्री ओली शुक्रबार कर्णाली जाने कार्यक्रम छ । उनी वैशाख १ गते शनिबार रारामा हुने कार्यक्रममा सहभागी हुनेछन् । त्यसैले अझै दुई दिन एकतासम्बन्धी बैठक बस्ने छैन । एकताका लागि अनौपचारिक रूपमा तय गरिएको मिति आउन करिब एक साता बाँकी रहँदा विवादित मुद्दा टुंगो लाग्न नसकेपछि संशय बढेको हो । यद्यपि पार्टी एकताकै विषयमा छलफल गर्न भन्दै एमालेले बोलाएको वैशाख ६ को पोलिटब्युरो र ७ गतेको केन्द्रीय समिति बैठक भने यथावत् छन् ।

     

    प्रतिकृया दिनुहोस्

    भक्तपुरमा भयरहीत वातावरणमा शान्तिपूर्ण तवरले निर्वाचन सम्पन्न

    भक्तपुरकी प्रमुख जिल्ला अधिकारी रुद्रादेवी शर्माले सीमित साधन र श्रोतका बीचपनि भक्तपुरमा शान्तिपूर्ण तवरले निर्वाचन...

    भक्तपुर औधोगिक क्षेत्रलाई स्थानान्तरण गर्नुपर्छ : सांसद सुवाल

    prem suwal

    भक्तपुरका संघीय सांसद समेत रहेका नेमकिपाका सचिव प्रेम सुवालले  ब्यासीस्थित बस्तीको बीचमा रहेको औधोगिक क्षेत्रलाई...

    मतदान स्थलमै मतगणना गर्नुपर्छ : न्यायाधिश बास्तोला

    गोपाल gopal prasad bastola

    भक्तपुरका मूख्य निर्वाचन अधिकृत एवं जिल्ला अदालतका न्यायाधिश गोपालप्रसाद बास्तोलाले निर्वाचन गराउन बजेट र जनशक्ति...

    ईश्वरको सपथ लिन इन्कार गरेका कम्युनिष्ट मेयरको उद्घोष : जनताको सेवाबाहेक स्वार्थ छैन

    भक्तपुर नगरपालिकाका नव निर्वाचित जनप्रतिनिधिको प्रमाण पत्र वितरण तथा शपथ ग्रहण कार्यक्रम सम्पन्न भएको छ...

    सूर्यविनायकमा एमाले नेतृत्वको निरन्तरता : मेयरमा थापा र उपमेयरमा भट्टराई निर्वाचित

    सूर्यविनायक नगरपालिकामा नेकपा (एमाले)ले आफ्नो नाक राखेको छ । जिल्लाका २ पालिकाको नेतृत्व गुमाउन पुगेको...