भक्तपुर, २३ साउनभक्तपुरको चाँगु नारायण नगरपालिका दुवाकोट घर भएका एक युवकलाई प्रहरीले नक्कली पेस्तोल सहित पक्राउ गरेको छ । आइतवार उनलाई काठमाडौंबाट प्रहरीले पक्राउ गरेको हो ।
पक्राउ पर्नेमा भक्तपुरको दुवाकोट घर भै काठमाडौं महानगरपालिका-११ सुन्धारामा डेरा गरी बस्ने २४ वर्षीय राजकुमार के.सी.रहेका छन् । उनलाई मेड इन युएस जिएमएम लेखेको नक्कली पेस्तोलसहित पक्राउ गरिएको प्रहरीले जनाएको छ । केसीले धाकधम्की र गलत प्रयोजनको लागि नक्कली पेस्तोल राखेको प्रहरीको अनुमान छ ।
नक्कली पेस्तोलसंगै केसीको साथबाट धारिलो हतियार छुरी १ थान, नियन्त्रित लागूऔषध डाईजोल्याप ३६ एम्पुल र फेनारगन ३४ एम्पुल समेत बरामद गरिएको प्रहरीले जानकारी गराएको छ ।
के.सी.ले उक्त लागूऔषध काठमाडौं महानगरपालिका-१० थापागाँउ बस्ने १९ वर्षीय अनिश थापा मगरबाट खरिद गरेको भनी बताएपछि प्रहरीले मगरलाई समेत पक्राउ गरेको खवर प्राप्त भएको छ ।
यस सम्बन्धमा प्रहरीले आवश्यक अनुसन्धान गरिरहेको बताएको छ ।