News Portal

  • ठग एसपीको भक्तपुरमा घर

    भक्तपुर, २९ साउन
    ८८१ पटक
    भक्तपुर, २९ साउन

    काठमाडौँ- नेपाल प्रहरीको प्रहरी उपरीक्षक (एसपी) भएको बताउँदै एक व्यक्ति विभिन्न सरकारी कार्यालयमा पुगिरहन्थे । उनी ती कार्यालयहरुमा अनुगमन, छानबिन आदिका लागि भन्दै पुग्ने गर्दथे ।

    ती व्यक्ति थिए, अन्दाजी ५० वर्षका नारायण सिंह बराल । उनी नेपाल प्रहरीको एसपी भएको बताउँदै विभिन्न सरकारी कार्यालयमा गएर कहाँ–कहाँ गडबड भएको छ, त्यो बारेमा पत्ता लगाउन छानबिन गरेको वा जानकारी लिएको जस्तो पनि गर्थे ।

    बरालले आफ्नो दरबन्दी अख्तियार दुरुपयोग अनुसन्धान आयोगमा रहेको भन्दै सरकारी कार्यालयका कर्मचारीलाई धम्क्याइ लाखौँ रुपैयाँ ठगी गर्न थालेपछि उनीविरुद्ध उनी ‘कार्यरत’ भनिएको संस्था अख्तियारमै उजुरी पर्यो ।

    बरालको पछिल्लो गतिविधि देखेर कर्मचारीले उनीमाथि शंका गर्न थालेका थिए । बराल भने निश्चिन्त हुँदै ठगेरै लाखौँ रुपैयाँ उठाइरहेका थिए ।

    आफ्नै ‘एसपी’ले घुस खाएको उजुरी आएपछि अख्तियारको टोली सक्रिय बन्यो । र, ती तथाकथित एसपीको पिछा गर्न थाल्यो ।

    साउन १ गते बराल ललितपुरको लगनखेलस्थित नापी कार्यालयमा ‘बार्गेनिङ’ गरिरहेका थिए । नापी कार्यालयका कर्मचारीसँग घुस रकम माग गरिरहेको अवस्थामा उनलाई अख्तियारको टोलीले नियन्त्रणमा लियोे ।

    सिन्धुलीको कमलामाई घर भई काठमाडौँको डिल्लीबजार बस्दै आएका बराललाई रकम माग गरिरहेको अवस्थामा अख्तियारको टोलीले पक्राउ गरेको ललितपुर प्रहरीले बताएको छ ।

    अख्तियारको टोलीले उनी सरकारी कर्मचारी नभएर ठग भएको पत्ता लगाएपछि तत्कालै महानगरीय प्रहरी परिसर ललितपुरलाई जिम्मा लगाएको थियो ।

    बरालको ठगी धन्दाको २४ वर्ष

    बराल पक्राउ पर्नुको रोचक कहानी छ । बराल यस्तो व्यक्ति हुन् जोे २४ वर्षसम्म नेपाल प्रहरीको नाम भजाएर कमाउ धन्दामा लागिरहे ।

    बरालको ठगी गर्ने चतुरताले ठगीका विषयमा नागरिक जति सचेत हुँदै जान्छन्, ठग पनि उही रफ्तारमा ठगीको नयाँ नयाँ शैली अपनाउँदै जान्छन् भन्ने यथार्थलाई पुष्टी गर्दछ ।

    बरालले वर्षौँदेखि एउटै शैली प्रयोग गरेर सरकारी कर्मचारीलाई ठगे । ठगी शृंखलाको २४ वर्षमा बरालले आफूलाई अख्तियार दुरुपयोग अनुसन्धान आयोगमा दरबन्दी भएको बताउँथे ।

    असईबाट सुरु गरेका थिए यस्तो धन्दा

    बरालले २०५२ सालदेखि ठगी धन्दा सुरु गरेको प्रहरी अनुसन्धानबाट खुल्न आएको छ । सुरुमा बराल नक्कली प्रहरी सहायक निरीक्षक (असई) रहेको दाबी गर्थे ।

    ५ वर्षपछि बरालले आफूलाई प्रहरी नायब निरीक्षक (सई) बताउन थाले । फेरि ५ वर्षपछि बरालले आफूलाई प्रहरी निरीक्षक (इन्सपेक्टर) बताउन थाले ।

    एक दशकमै बरालले आफ्नो धन्दालाई उपत्यकाबाहिर समेत विस्तार गरेको पाइएको छ । इन्सपेक्टर भएको ९ वर्षपछि बरालले आफूलाई प्रहरी नायब उपरीक्षक (डीएसपी) बताउन थालेका थिए ।

    डीएसपीमा बढुवा भएपछि बरालले आफूलाई अख्तियारमा कार्यरत रहेको भन्दै विभिन्न सरकारी कार्यालयमा गएर निर्वाध बार्गेनिङ गर्ने गरेको प्रहरीको अनुसन्धानबाट खुल्न आएको छ ।

    सुरुमा नक्कली असई बनेका बराल २३ वर्षपछि आफूलाई प्रहरी उपरीक्षक (एसपी) बताउन थाले । २०७५ सालमा एसपीमा बढुवा भएको भन्दै उनले दरबन्दी भने उही अख्तियार बताउँथे ।

    छिट्टै एसएसपीमा बढुवा हुन्छु भन्थे बराल

    बरालले आफ्नो पहुँच माथिल्लो तहसम्म रहेको भन्दै छिट्टै नै प्रहरी वरिष्ठ उपरीक्षक (एसएसपी) मा बढुवा हुन्छु भन्दै आएको प्रहरीको अनुसन्धानबाट खुल्न आएको छ ।

    बरालले सरकारी कर्मचारीलाई नै ठगिरहे । आफ्नो पोल खुल्ने र पछि अख्तियार धाउनुपर्ने डरले सरकारी कर्मचारीले पनि उनीविरुद्ध केही बोल्न सकेनन् ।

    बरालको आँखा ‘कमाउ अड्डा’मा

    जहाँ बढी कमाइ हुन्छ बरालको आँखा पनि त्यस्तै कमाउ अड्डातिर जाने गरेको प्रहरीको अनुसन्धानबाट खुल्न आएको छ ।

    ललितपुर परिसरका प्रवक्ता डीएसपी नारायण चिमौरियाका अनुसार बरालले मालपोत कार्यालय, नापी कार्यालय जस्ता ‘कमाउ अड्डा’मा गएर कर्मचारीलाई ‘ब्ल्याक मेल’ गर्थे ।

    बरालले कतिपय ठाउँमा सेवाग्राहीसँगै हिँडेर घुस लिने कर्मचारीको रेकी गर्दै सम्बन्धित कर्मचारीसँग भाग माग्ने गरेको पाइएको डीएसपी चिमौरियाले रातोपाटीलाई बताए ।

    पक्राउ परेको दिन ३ वटा कार्यालयमा पुगेका थिए बराल

    साउन १ गते दिउँसो पक्राउ परेका बराल सो दिन ३ वटा सरकारी कार्यालय पुगेर आएको प्रहरीको अनुसन्धानबाट खुल्न आएको छ ।

    पक्राउ परेको दिन बराल चावहिल, डिल्लीबजार र कलंकी पुगेर ललितपुरको नापी कार्यालय आएका थिए ।

    विशेष सूचनाको आधारमा नापी कार्यालयका कर्मचारीसँग ‘बार्गेनिङ’ गर्दागर्दै बराललाई अख्तियारको टोलीले पक्राउ गरेको थियो ।

    ठगी गरेरै भक्तपुरमा घर, विभिन्न ठाउँमा जग्गा

    ठगी गरेरै बरालले भक्तपुरमा घर बनाएको पाइएको छ भने विभिन्न ठाउँमा जग्गा जोडेको समेत भेटिएको छ ।

    नेपाल प्रहरीको नक्कली असईदेखि एसपीसम्म बन्न भ्याएका बरालले सरकारी कर्मचारीलाई धम्क्याएरै भक्तपुरमा घर बनाएको पाइएको छ ।

    पोल खुलेपछि यसरी पक्राउ परे

    बरालदेखि सरकारी कर्मचारी आजित भइसकेका थिए । बरालमाथि शंका भएपछि मालपोत कार्यालयमा कार्यरत एक कर्मचारीले बरालको शैलीबारे अख्तियारमा जानकारी गराए ।

    आयोगले पनि बराल सरकारी कर्मचारी नै हुनसक्ने आशंका गरेको थियो । जब अख्तियारले बराललाई पक्राउ गर्यो, तब बराल कुनै सरकारी कर्मचारी नभएको पोल खुल्यो ।

    ठगी उद्योगमा मुद्दा

    पक्राउ परेका बरालमाथि ललितपुर प्रहरीले ५ दिनको म्याद थप गरेर ठगी उद्योगमा मुद्दा चलायो । तर, ठगी गरेको प्रमाण नपुगेको भन्दै अदालतले बराललाई छाड्न आदेश दियो । जिल्ला अदालत ललितपुरको आदेश लगत्तै बराल साउन २३ गते २५ हजार धरौटीमा रिहा भएका छन् ।

    बरालले सजिलै छाड्लान् अब यो पेशा ?

    सानैदेखि लागेको बानी त्यति सजिलै कहाँ छुटाउन सकिन्छ र । त्यसमा झनै आर्थिक लेनदेनको कुरा । धन देखेपछि महादेवको त तीन नेत्र खुल्छ भन्ने उखान छ । लाखौँ रुपैयाँमा खेलिरहेका बराल अदालतको आदेशसँगै रिहा भएसँगै पुनः त्यही धन्दामा फर्किन्छन् या फर्किदैनन् । सबैको चासोको विषय छ ।
    मंगलबार रातोपाटीमा प्रकाशित सुजन पन्तको रिपोर्ट

    प्रतिकृया दिनुहोस्

    मध्यरातमा लुटियो आकाश भैरवको मुर्ति

    हल्चोक स्थित हल्चोक आकाश भैरवको मुर्ति मध्यरातमा लुटिएको छ। हल्चोक आकाश भैरव गुथिका अध्यक्ष सागर...

    बनेपालीको नेतृत्वमा बन्यो बागमती प्रदेश स्तरीय लेखक संघ

    अखिल नेपाल लेखक संघ, बागमती प्रदेशमा अगिव बनेपालीको अध्यक्षतामा नयाँ कार्यसमिति चयन गरिएको छ ।...

    भक्तपुर नगरब्यापी विद्यालयस्तरीय खेलकुद प्रतियोगिता शुरु

    भक्तपुर नगरपालिकाले हरेक वर्ष गर्दै आएको नगरव्यापी विद्यालयस्तरीय खेलकुद प्रतियोगिता शुरु भएको छ । सोमबार...

    भक्तपुरका ८ मानन्धर सम्मानित

    भक्तपुर उद्योग वाणिज्य संघका नवनिर्वाचित अध्यक्ष शिवप्रसाद मानन्धरसहित ८ जना अगुवा मानन्धरहरुलाई सम्मान गरिएको छ...

    जुगलको अध्यक्षतामा प्रेस सेन्टर नेपालको नयाँ नेतृत्व निर्वाचित

    क्रान्तिकारी पत्रकारहरुको संगठन प्रेस सेन्टर नेपालको चितवनमा सम्पन्न चौथो राष्ट्रिय महाधिवेशनबाट नयाँ नेतृत्व चयन भएको...