भक्तपुर, ११ चैत विश्वव्यापी महामारीको रुपमा देखा परेको नोभल कोरोना भाइरस (कोभिड १९) को सम्भावित संक्रमण रोक्न नेपाल सरकारले घोषणा गरेको लक् डाउन(बन्द) को भक्तपुरमा सकारात्मक प्रभाव परेको छ । भाडाका सवारीसाधन र अत्यावश्यक पसल बाहेक बजार पूर्णतया बन्द भएका छन् ।
लक् डाउनको पहिलो दिन भएकाले कतिपय मानिसहरु कुरा नबुझेर बाहिरको अवस्था हेर्न निस्कदा प्रहरीलाई सास्ती भएको थियो । घरमै बस्न सरकारले अनुरोध गरेपनि केहि मानिसहरु भने सडकमा निस्केका थिए । ”मानिसहरुले लक् डाउन लाई राजनीतिक पार्टीहरुले गर्ने नेपाल बन्दकै शैलीमा बुझेको देखियो । यो चुनौतीपूर्ण कुरा हो ।” सडकमा मानिसलाई रोक्न खटिरहेका एक प्रहरीले भक्तपुरपोस्ट संग गुनासो गरे ।
भक्तपुरको प्रमुख जिल्ला अधिकारी हुमकला पाण्डेले सरकारको निर्णयलाई भक्तपुरवासीले पालना गरेको भन्दै धन्यवाद व्यक्त गरिन् । उनले केहि मानिसहरु सडकमा देखिए पनि पहिलो दिन भएकोले कुरा बुझाएर छाडिएको बताइन । ”आगामी दिनमा हामी कठोर हुन्छौं, सरकारको निर्णय पालना गरेर घरमै क्वारेन्टाइनमा बस्नुभएका जिल्लावासीप्रति आभारी छौं ।” प्रजिअ पाण्डेले भनिन् । कोभिड १९ को संक्रमण रोक्न सरकारी प्रयासले मात्र सम्भव नभएको भन्दै उनले सबै जनसमुदायको साथ् र सहयोग आवस्यक रहेको बताइन ।
मंगलवार उनले सरकारको निर्णय बमोजिम १८ चैतसम्म बन्दको आदेश जारी गरेकी छन् । उनले आदेश उलंघन गर्नेलाई कानूनबमोजिम कडा कारवाही हुने समेत चेतावनी दिएकी छन् ।
हेर्नुस् सङ्क्रामक रोग ऐन, २०२० को दफा २ तथा स्थानीय प्रशासन ऐन, २०२८ को दफा ६(३) बमोजिम प्रमुख जिल्ला अधिकारी हुमकला पाण्डेले जारी गरेको आदेश
